भारतिय समिक्षक भन्छन्, ‘साहो कमजोर कथाको फिल्म’

एजेन्सी– ‘बाहुबली’ र ‘बाहुबली २’ को सफलतापछि प्रभासको बलिउड फिल्म ‘साहो’ आज देखि प्रर्दशनीमा आएको छ । करिब दुई वर्ष लगाएर तयार पारिएको फिल्मलाई दर्शकले निकै प्रतिक्षा गरेका थिए । फिल्म रिलिज त भयो तर बाहुबलीको प्रभावलाई कायम राख्न सकेको छैन ।

फिल्म समिक्षकको पाँच रेटिङमा एक वा दुई रेटिङ भन्दा माथि उठन सकेको छैन । भारतिय समिक्षक तरण आर्दशले फिल्मलाई १.२ रेटिङ दिदै टुविट गरेका छन् । उनले लेखेका छन्, ‘प्रतिभा, ठूलो बजेट र अवसरको एक विशाल कचरा.. कमजोर कथा, भ्रमित पटकथा र कमजोर निर्देशन ।’

त्यस्तै, समिक्षक सुमित कँडेल एक रेटिङ दिदै लेखेका छन्, ‘साहो सन् २०१९ को सबैभन्दा ठूलो निराशाजनक फिल्म हो । फिल्मको राम्रो कुरा– प्रभासको स्क्रिन उपस्थिति । फिल्मको नराम्रो कुरा– धेरै कलाकारको खराब प्रर्दशन, नबुझिने कथा, अत्याधिक खराब पटकथा, खराब निर्देशन र यति धेरै नराम्रा गीतहरु । तपाई आफै जोखिम उठाएर फिल्म हेर्नुस् ।’ प्रभासको बाहुबली हिट भएपछि उनलाई बलिउडमा तान निकै होडबाजी चल्यो । उनलाई बलिउडमा ल्याउन निर्देशक सुजित सफल भए तर प्रभासलाई निर्देशन गर्ने भने सफल भएनन् ।

यो फिल्ममा प्रभासको अपोजिट श्रद्धा कपूर छिन् । तर फिल्मको मुख्य आक्रर्षकको बिन्दु भनेको प्रभास नै हुन् । सामाजिक सञ्जालमा जति पनि समिक्षा आएको छ त्यो सब प्रभासलाई लिएर आएको छ । श्रद्धा कपूरको एक्सन र अभिनयलाई लिएर कुनै पनि समिक्षा बाहिरिएको छैन ।

प्रभासको बलिउड डेब्युलाई शानदार बनाउनको लागि निर्माण टिमले दुई वर्ष लगाएर ३५० करोड बजेटमा फिल्म निर्माण गरेका थिए । प्रभासको सोचे जस्तो बलिउड डेब्यु हुन सकेन । यो फिल्म प्रति प्रभासका फ्यान पनि निराश भएका छन् । फ्यानकै साइडबाट हेर्ने हो भने मिश्रित प्रतिक्रिया आएको छ । केहि दर्शकले फिल्म निकै मन परेको बताएका छन्, भने केहि दर्शकले समय र पैसाका बर्बाद भएको प्रतिक्रिया दिएका छन् ।