‘जिरो’पछि साउथ निर्देशक एटलीको फिल्ममा शाहरुख !
एजेन्सी – बलिउड सुपरस्टार शाहरुख खानले ‘जिरो’ फिल्मको असफलता पछि कुनै फिल्म साइन गरेका छैनन् । उनलाई धेरै फिल्मको अफर आएपनि फिल्म साइन गर्न डराईरहेका छन् । उनले कुनै फिल्मको आधिकारिक घोषणा नगरेपनि साउथ निर्देशक एटली कुमारको फिल्ममा शाहरुख देखिने सम्भावना बढि रहेको छ ।
साउथ निर्देशक एटलीको फिल्ममा शाहरुख खानले काम गर्ने लामो समयदेखि चर्चाको विषय बनेको छ । तर, शाहरुख र निर्देशक एटली कसैले पनि यो फिल्मको आधिकारिक घोषणा गरेका छैनन्। एक कार्यक्रममा निर्देशक हरि शंकरले एटलीको तारिफ गर्दै एटली र शाहरुखलाई नयाँ फिल्मको शुभकामना दिएका छन् । सार्वजनिक भिडियोमा निर्देशक हरि शंकरले भनेका छन्, ‘एक लेखक–निर्देशक भन्दा बढि फ्यान भएको नाताले शाहरुखको फिल्मको पर्खाइमा छु । एटली सरले किंग खान एसआरकेलाई निर्देशन गर्ने खबर सुनेको छु । थाहा छैन यो काम कति छिटो हुन्छ । म एसआरकेको एकदमै ठूलो फ्यान हुँ । यो फिल्मको लागि तपाईलाई शुभकामना !’
केहि दिन अगाडी शाहरुख खान संजय लीला भन्सालीको फिल्मबाट फर्कने खबर बाहिरिएको थियो । तर, शाहरुखले टुविट मार्फत उक्त खबर गलत भएको बताएका थिए ।
