सलमान खानको कब्जामा नेपालका मल्टिप्लेक्स
सलमान खान अभिनित बहु प्रतिक्षित फिल्म ‘दबंग ३’ नेपालका हलहरुमा कब्जा जमाएको छ । प्रभु देवा निर्देशित बलिउड फिल्मले नेपालका एकल तथा मल्टिप्लेक्समा उपलब्ध सबै शो पाएको हो ।
डिसेम्वर २० देखि लाग्ने सलमान खानको ‘दबंग ३’ लाई क्युएफएक्स अन्र्तगतका हलहरुमा मात्रै ८८ शो दिइएको छ । जुन शो संख्या सर्वाधिक हो । यति धेरै शो संख्या पाउने सम्भवतः दबंग ३ नै पहिलो फिल्म हो । राजधानी र मोफसल गरी क्युएफएक्सका १२ वटा हलहरु छन् । क्युएफएक्स जस्तै देशका अन्य हलहरुमा पनि ‘दबंग ३’ को शो संख्या सर्वाधिक छ ।
शो संख्या हेर्दा सलमानको यो फिल्मले रेकर्ड ब्रेकको कमाइ गर्ने आँकलन छ । वर्ड अफ माउथ राम्रो भएको खण्डमा सलमानले सबै रेकर्ड तोड्नेछ । सलमान अभिनित पछिल्लो पटक भारत प्रदर्शनमा आएको थियो । भारतलाई पनि यति धेरै शो दिइएको थिएन । फिल्ममा सलमानसँगै सोनाक्षी सिन्हा र नव नायिका साई मन्जिरकरको मुख्य भूमिका छ ।
सलमानको दबंग ३ आउने भएपछि यो मितिमा कुनै पनि नेपाली निर्माताले आफ्नो फिल्मको प्रदर्शन मिति तय गरेका छैनन् । रानी मुर्खजीको ‘मर्दानी २’ ले दोश्रो सातामा सिमित हल संख्या पाएको छ ।
