अक्षय र करीनाको ‘गुड न्यूज’लाई तारिफै तारिफ
एजेन्सी – बलिउड अभिनेता अक्षय कुमारको फिल्म गुड न्यूज पुष ११ गते शुक्रबार देखि प्रर्दशनमा आइसकेको छ । यो फिल्म प्रर्दशन भएसँगै दर्शक र समीक्षकले प्रतिक्रिया दिन सुरु गरिसकेका छन् । दर्शकले यो फिल्मलाई भरपुर मनोरञ्जन फिल्म बताइरहेका छन् ।
यो फिल्मलाई दर्शकको साथै समीक्षकले पनि उत्कृष्ट प्रतिक्रिया दिएका छन् । फिल्म समीक्षक तरण आर्दशले गुड न्यूजलाई ५ रेटिङ्गमा ४ स्टार दिदै सुपर हिट फिल्म बताएका छन् । उनले टुविट लेखेका छन्, ‘यो फिल्म सुपर हिट फिल्म हो । स्मार्ट लेखन र अक्षय, करीना, कियारा, दिलजितको उत्कृष्ट काम ।’
फिल्म वरुण बत्रा (अक्षय कुमार) र उनकी पत्नी श्रृति बत्रा (करीना कपूर खान) आ–आफ्नो प्रोफेशनमा सफल छन् । उनीहरु आफ्नो करियरमा सफल भएपछि आमाबुबा बन्न चाहन्छन् । तर, निकै कोशिस गर्दा पनि आमाबुबा बन्न सक्दैनन् । त्यसैले उनीहरुले आईवीएफ टेक्नोलोजीको सहारा लिन्छन् । उनीहरुको जस्तै हनी बत्रा (दिलजित दोसाँझ) उनकी पत्नी मोनिका (कियारा अडवानी) पनि बच्चाको लागि आइवीएफ टेक्नोलोजीको सहारा लिन्छन् । बत्रा थर भएका कारण उनीहरुको स्पर्म परिवर्तन हुन्छ । स्पर्म परिवर्तन भएपछि हुने समस्यालाई फिल्ममा देखाइएको छ ।
राज मेहताले निर्देशन गरेको फिल्ममा अक्षय कुमार, करीना कपूर खान, दिलजित दोसाँझ, कियारा अडवानीको मुख्य भुमिका रहेको छ । यो फिल्मबाट निर्देशक मेहताले पनि निकै तारिफ पाएका छन् ।
