शाहरुखलाई फ्यानको धम्की, ‘नयाँ फिल्म घोषणा नगरे आत्महत्या गर्छु’

एजेन्सी– बलिउड सुपरस्टार शाहरूख खानले आनन्द एल रायको फिल्म ’जिरो’ पछि कुनै फिल्म साइन गरेका छैनन् । यो फिल्म फल्प भएपछि उनले फिल्ममा ब्रेक लिएका थिए ।

लामो समय बित्दा पनि शाहरुखले कुनै फिल्म साइन नगरेपछि उनका फ्यान आत्तिसकेका छन् । किंग खानका फ्यान उनको आगामी फिल्मको प्रतिक्षामा छन् । उनको जन्मदिन २ नोभेम्बरमा आगामी फिल्मको घोषणा गर्छन् भन्ने धेरैको आशा थियो । तर उनले अहिलेसम्म कुनै फिल्म घोषणा गरेका छैनन् । अब, उनका फ्यानले उनको आगामी फिल्मको धेरै प्रतिक्षा गर्न नसक्ने बताएका छन् । उनका फ्यानहरुले ह्याज ट्यागको प्रयोग गरी ‘हामी शाहरुखको नयाँ फिल्मको घोषणा चाहन्छौ’ भन्ने ट्रेन्ड सुरु गरेका छन् ।

एक प्रयोगकर्ताले लेखेका छन् खान साहब, अब धेरै भइसक्यो । मैले ’जिरो’पछि कुनै फिल्म हेरेको छैन किनकी कुनै उत्साह नै छैन । अब तपाईंले कुनै गुड न्यूज दिनुपर्छ । चाहे धूम साइन गर्नु या निर्देशक एटलीको फिल्म, प्लिज । तपाई इन्डस्ट्रीको चार्म हो ।’

त्यस्तै अर्का प्रयोगकर्ताले लेखेका छन्, ‘यदि तपाईंले जनवरी १ सम्म फिल्म घोषणा गर्नुभएन भने म आत्महत्या गर्छु । फेरि भन्दैछु, म आत्महत्या गर्छु ।’ तर पछि यस प्रयोगकर्ताले टुविट हटाएका छन् । ट्विटरमा चलिरहेको यो कुराकानीमा शाहरूख खानले अहिलेसम्म कुनै प्रतिक्रिया दिएका छैनन् ।