अजयको तानाजी ‘२०२०’ मा २ सय करोड कमाउने पहिलो फिल्म
एजेन्सी – बलिउड अभिनेता अजय देवगन स्टारर फिल्म ‘तानाजीः द अनसंग वारियर’ २०० करोड क्लबमा प्रवेष भएको छ । यो फिल्म तेस्रो सातामै २ सय करोड क्लबमा समावेश भएको हो ।
बलिउडका ट्रेड एनालिस्ट तरण आदर्शका अनुसार फिल्मले २४ जनवरी शुक्रबार ५.३८ करोडको व्यापार गर्दै २०२ करोड ८३ लाख जम्मा गरेको थियो । यो हप्ता कंगना रनावतको ‘पंगा’ र रेमो डेसुजाको ‘स्ट्रिट डान्सर’ दुई फिल्म रिलिज हुँदा पनि तानाजीको प्रभाव कायमै छ । फिल्मले हिजो शनिबार ९ करोड ५२ लाख कलेक्सन गर्दै फिल्मले २१२ करोड ३५ लाख जम्मा गरेको छ । तानाजी २०२० मा २०० करोड कमाउने पहिलो फिल्म बनेको छ ।
ओम राउतले निर्देशन गरेको फिल्ममा अजयले तानाजी मलुसरेको भूमिकामा निभाएका छन् । फिल्ममा अजयसँगै काजोल र सैफअली खानको मुख्य भूमिका रहेको छ ।
