फर्कियो स्टारडम : अनमोल, प्रदीप, पल र आर्यन चम्किए
युवा स्टार अभिनित एकसाथ प्रदर्शनमा आएका दुई फिल्मले दर्शकलाई हलमा तान्न सफल भएका छन् । ‘फर्की फर्की’ र ‘पुजार सार्की’को इनिसियल बम्पर ओपनिसँगै अनमोल केसी, प्रदीप खड्का, आर्यन सिग्देल र पल शाहको स्टारडम फर्किएको चर्चा सुरु भएको हो ।
अनमोल केसी स्टारर फिल्म फर्कीप्रति युवा पुस्ताका दर्शकको आकर्षण उच्च देखिएको छ । राजधानी सहित देशका मुख्य शहरमा यो फिल्म हेर्न दर्शक उर्लिएका छन् । सुयोग गुरुङको लेखन तथा निर्देशन रहेको फिल्मले टाइम लुपको कथालाई प्रस्तुत गर्दछ, जसलाई दर्शकले रुचाएका छन् । अभिनेता अनमोल केसीको दशौं फिल्म फर्की फर्कीमा उनको अभिनयको प्रशंसा भैरहेको छ ।
निर्देशक दिनेश राउत निर्देशित फिल्म ‘पुजार सार्की’ले युवा र पारिवारिक दुबै तर्फका दर्शकलाई आकर्षण गरिरहेको छ । विकास सुवेदीको लेखन रहेको फिल्ममा तीन स्टार आर्यन, प्रदीप र पलको पात्रलाई ब्यालेन्समा राखेर रमाइलो तरिकाले फिल्म बनाइएको छ । पुजार, मैतबहादुर र मेघराज पात्रको फिल्ममा आ पृष्ठभूमि छ, फिल्मको अन्त्यसम्म आइपुग्दा यी तीन पात्रले नेपाली समाजमा रहेको विद्यामान जात व्यावस्थाप्रति सोच्न बाध्य बनाउँदछन् ।
फरक फरक विषयमा बनेका ‘फर्की फर्की’ र ‘पुजार सार्की’को आक्रमक सुरुवाती व्यापारसँगै दुई फिल्मले अनमोल, प्रदीप, पल र आर्यनको स्टारडमलाई फर्काएको चर्चा सुरु भएको हो ।
हुन् पनि हो, लामो समयदेखि यी स्टारका फिल्मले बक्स आक्रमक व्यापार गरिरहेका थिएनन्, ‘फर्की फर्की’ र ‘पुजार सार्की’ले यसलाई विश्राम लगाइदिए।
