अष्ट्रेलिया र न्यूजिल्याडमा ‘फर्की फर्की’को वम्पर व्यापार
अनमोल केसी र जसिता गुरुङ स्टारर फिल्म फर्की फर्की ले अष्ट्रेलिया र न्यूजिल्याडमा उत्कृष्ट कलेक्सन गर्न सफल भएको छ । फिल्मले यी देशमा एक करोड रुपैयाँभन्दा बढीको कलेक्सन गरेको वितरण कम्पनीले जनाएको छ ।
अष्ट्रेलियाका ८ र न्यूजिल्यान्डका ६ वटा राज्यमा रिलिज भएको यो फिल्मले पहिलो सप्तान्त उत्कृष्ट कमाई गरेको वितरक नमस्ते इन्टरटेनमेन्टले जनाएको छ । ‘सुरुवाती तीन दिनको कमाईले यसअघिको नेपाली फिल्मको रेकर्डलाई उछिनेको छ’ वितरक देव कार्कीले भनेका छन् । उनका अनुसार ती २ मुलुकका ४५ हलका ५०० पर्दाबाट फिल्म रिलिज भएको हो । गोल्डक्लासका थिएटरमा समेत फिल्म हाउसफूल रहेको जनाइएको छ ।
रोहित अधिकारीले निर्माण गरेको यो फिल्म अमेरिका र मध्यपूर्वमा समेत रिलिज भएको छ । ११ अमेरिकी सहरमा उत्कृष्ट प्रतिक्रियासहित फिल्म प्रदर्शन भैरहेको अमेरिकी वितरक प्याट्रिक सुवेदीको भनाइ छ । मध्यपूर्वमा पनि सुखद् प्रतिक्रिया सहित फिल्म चलेको वितरक रमेश ढकालले जानकारी दिए ।
सुयोग गुरुङ निर्देशित यो फिल्मले नेपालमा सुरुवाती व्यापार आक्रमक गरेको छ । फिल्ममा अनमोल र जसितासँगै नव कलाकार रवि काफ्ले र समृद्धि अर्यालको मुख्य भूमिका छ ।
