‘कमेडी क्लब विथ च्याम्पियन्स’ले साट्यो खुसी
कमेडी रियालिटी शो ‘कमेडी क्लब विथ च्याम्पियन्स’ सफल रुपमा प्रशारणको २६ भाग पुगेकोमा खुसीयाली मनाएको छ । आइतबार शोका पहिलो पाहुना दिपकराज गिरीको प्रमुख आतिथ्यमा च्याम्पियन युनिटले केक काटेर सेलिव्रेसन गरेको हो ।
‘कमेडी क्लब विथ च्याम्पियन्स’को अबको बाँकी भाग कमेडियन विक्की अग्रवालले निर्देशन गर्ने जानकारी पत्रकार सम्मेलनमा दिइयो । १० भागसम्म विक्कीले नै निर्देशन गरेको शोको बाँकी भाग विशालले अगाडि बढाएका थिए । तर, अब बाँकी भाग विक्कीले नै सुरु गर्नेछन् ।
शोका निर्देशक विशाल भण्डारीले सुरुवातमा कार्यक्रमलाई अगाडि बढाउन केही गाह्रो भएपनि अहिले दर्शकको माया पाउँदा खुशी लागेको बताए । सुरुवातमा युट्युबमै भ्यूज नपाउँदा समस्या भएपनि अहिले हरेक शो दश लाख भन्दा बढीले युट्युबमा हेरेको भन्दै उनले नयाँ नयाँ सोचका साथ शोलाई अगाडि बढाउने बताए ।
कार्यक्रममा प्रमुख अतिथीको रुपमा पुगेका दीपकराज गिरीले भने-‘पहिलो भागमा म अतिथीको रुपमा पुगेको थिएँ । सो समयमा कलाकारहरुले मलाई हसाँउन सकेनन् । तर, अहिले शो गज्जब तरिकाले अगाडि बढिरहेको छ । यो शोमा सहभागी भाइबहिनीहरुको प्रगति देखेर खुशी लागेको छ ।’
यस्तै, शोकी अध्यक्ष दीपाश्री निरौलाले पनि नयाँ पुस्ताले कमेडीलाई नयाँ तरिकाले अगाडि बढाएको भन्दै खुशी व्यक्त गरिन् । उनले, शोमा काम गर्दा पारिवारिक वातावरणमा रमाइलो शैलीमा काम गर्ने गरेको पनि खुलाइन् ।
यो शोमा सुमन कार्की, कैलाश कार्की, पवन भट्टराई, उषा रजक, उमेश राई, साजन श्रेष्ठ, विक्की अग्रवाल, मेक्सम गौडेलले आफ्नो प्रस्तुति दिदै आएका छन् । कि एड्भटाइजिङ र थर्ड आई प्रोडक्शनसँग मिलेर यो शो निर्माण भैरहेको छ । यो शो आउँदो बर्षको असार मसान्तसम्म चल्नेछ ।
