बिराज भट्टको ‘१२ गाउँ’मा ऐतिहासिक एक्सन हुने
एक्सन स्टार अभिनेता विराज भट्टले नयाँ फिल्म ‘१२ गाउँ’ निर्माण तथा निर्देशनको घोषणा गरेका छन् । विराज स्वयंमको मुख्य भूमिका रहने फिल्म एक्सन थ्रिलर जनरामा बन्नेछ ।
एक्सन फिल्म ‘१२ गाउँ’ मा सन्तोष सरकारको कथा तथा पटकथा रहनेछ । फिल्मलाई सन् २०२४ मा रिलिज गर्ने तयारीका साथ छायाँकनको तयारी हुँदैछ । विराजले नेपाली सिने इतिहासकै उच्च स्तरीय एक्सन पस्किने तयारी गरेको बताएका छन् ।
फिल्ममा ‘रियल एक्सन स्टार’का रुपमा परिचित विराजले आफ्नो सोही छविलाई ‘१२ गाउँ’बाट अझ एक कदम अगाडि लैजाने बताइन्छ । यसअघि ‘साङ्लो’ निर्माण तथा निर्देशन गरेका विराजको यो दोश्रो प्रस्तुति ‘१२ गाउँ’ बिग बजेटमा तयार हुनेछ । ‘१२ गाउँ’ सिनेमा विराजको होमप्रोडक्सन कम्पनी विराज भट्ट फिल्म प्रोडक्सन कम्पनीको ब्यानरमा तयार हुनेछ ।
नेपाली फिल्म क्षेत्रका सफल एक्सन स्टार केही बर्षदेखि भने भोजपुरी फिल्ममा व्यस्त छन् । उनी भोजपुरी सिनेमाका ‘ए’ लिस्टर स्टार हुन् ।
