‘गोर्खा वारियर’ बेलायतको बाफ्टा अवार्डमा छनोट
नेपाली फिल्म ‘गोर्खा वारियर’ ब्रिटिश एकेडेमी अफ फिल्म एण्ड टेलिभिजन आर्टस् (बाफ्टा) अवार्डमा चयन भएको छ । निर्देशक मिलन चाम्सले यो अवार्डमा नेपाली फिल्म चयन हुनुलाई नेपाली फिल्मको इतिहासमै एउटा ठुलो सफलताको रुपमा लिएको बताएका छन् । बेलायतमा आयोजना हुँदै आएको यो अवार्ड ओष्कार अवार्डपछि संसारकै प्रतिष्ठित अवार्ड मानिन्छ ।
‘गोर्खा सैनिकलाई बेलायती नागरिकहरुले उच्च सम्मान दिँदै आएको अवस्थामा नेपाली चलचित्र गोर्खा वारियार बेलायतकै प्रतिष्ठित अवार्ड वाफ्टामा चयन हुनु नेपाली चलचित्र उधोगकै लागि गौरवको बिषय हो ।’ निर्देशक चाम्सले भने । यो अवार्डमा प्रदर्शनी गरिने फिल्महरुको सूची वाफ्टाले सार्वजनिक गरेको छ । यो अवार्डमा हलिउड सहित विभिन्न युरोपियन फिल्महरु पनि चयन भएका छन् । जसमा नेपाली फिल्म गोर्खा वारियरले यो अवार्डमा चयन भएको हो । यो अवार्डका लागि बेस्ट फिल्म, डिरेक्टर, एक्टर, फिल्म (अंग्रेजी बाहेक) र बेस्ट ब्रिटिश फिल्म विधामा फिल्म गोर्खा वारियरले प्रतिस्पर्धा गर्ने पनि निर्देशक चाम्सले जानकारी गराएका छन् ।
अब यो अवार्डको लागि यी विधाहरुको लागि उत्कृष्ट पाँचको मनोनयन सूची अगाामी १८ जनवारीमा सार्वजनिक गरिने भएको छ । त्यसपछि मनोनयनमा परेका फिल्मका विभिन्न विधाबीच आउँदो १८ फेब्रुअरी २०२४ मा साउथ बैंक सेन्टर लन्डनमा यो अवार्ड आयोजना हुने भएको छ । फिल्म गोर्खा वारियरलाई नेपालमा भने आगामी फागुन वा चैतमा रिलिज गर्ने लक्ष्य रहेको निर्देशक चाम्सले जानकारी गराए ।
यो फिल्ममा रितेश चाम्सले अभिनेताको रुपमा डेब्यु गरेका छन् । उनीसँगै यसमा विजय लामा, रेविका गुरुङ, रियर राई, शिशिर बाङ्देल, कविता आले, बिरूप घले, सारा राईलगायतका कलाकारहरुको मुख्य भूमिका रहेको छ । गोर्खा वारियार नेपाली, अङ्ग्रेजी र हिन्दी भाषामा समेत प्रदर्शन हुनेछ । फिल्मको लन्डनमा प्रिमियर गरिएको थियो ।
