‘सानो संसार’लाई सेन्सरको ‘यु’ पत्र
असोज ११ गतेबाट प्रदर्शनमा आउने फिल्म सानो संसार सेन्सर पास भएको छ । अर्जुन कुमार निर्मित फिल्मले केन्द्रीय जाँच पास समिति (सेन्सर बोर्ड)बाट युनिभर्सल सर्टिफिकेट पाएको हो ।
अब यो फिल्म हरेक उमेर समुहका दर्शकले सजिलै हेर्न पाउने छन् । फिल्मको प्रचार सामाग्रीले पनि दर्शकबाट राम्रो प्रतिक्रिया पाइरहेकाले दर्शकबाट राम्रो साथ पाउने विश्वास निर्माण टिमलाई छ । फिल्मले बिहीबार सेन्सर बोर्डबाट पनि उत्कृष्ट प्रतिक्रिया पाएको समेत निर्माता अर्जुन कुमारको भनाई छ । सेन्सर बोर्डका प्रतिनिधिले ‘सानो संसार’ हेरेपछि मध्यम वर्गीय परिवारको मर्मीस्पर्शी कथाले मन जितेको प्रतिक्रिया दिएका थिए ।
असोज ११ गतेबाट प्रदर्शनमा आउने फिल्मले मध्यम वर्गीय परिवारले गर्ने संघर्ष र सन्तानको विदेश मोहले निम्त्याएको कलहलाई मर्मस्पर्शी ढंगले पस्किएको छ । पारिवारिक कथावस्तुमा निर्माण भएको सिनेमामा हास्य कलाकार केदार घिमिरे ‘माग्नेबुढा’की श्रीमती सीतादेवी तिमल्सेनाको मुख्य भुमिका रहेको छ ।
फिल्ममा सीता सँगै राज पंगेनी शर्मा, अनु दाहाल, अन्जसा रिजाल शिशिर सिवाकोटी, सरिता भण्डारी र जीवन गौतमको अभिनय रहेको छ । यी सवै कलाकारले नेपाली रजतपटमा डेव्यु गर्दैछन् । सिद्धार्थ पुडार्सनीले सिनेमालाई निर्देशन गरेका हुन् । यही सिनेमाबाट उनले लेखन तथा निर्देशनमा डेव्यु गर्दैछन् । उनलाई सिनेमाको कथा लेखनमा सरिष्मा खत्रीले सघाएकी छन् । प्रवीन खड्काको छायांकन र रोमी तन्डुकारको सम्पादन रहेको सिनेमाको डिजिटल पाटर्नर म्युजिक नेपाल र क्रिएटिभ पाटर्नर टुनामुना कन्सेप्ट हो ।
राजधानी मिडिया एड प्रोडक्सन र प्रिन्सेस मूभिजको व्यानरमा सिनेमा निर्माण भएको छ । अर्जुन कसमार निर्माता रहेको सिनेमाका कार्यकारी निर्माता माधव वाग्ले हुन् । राजधानी मिडिया र प्रिन्सेस मूभिजले सिनेमालाई संयुक्तरुपमा प्रदर्शन गर्नेछन् ।
