राजेशले केपीलाई भने, ‘नेतृत्व तपाईंले लिनुस्’
अभिनेता राजेश हमालले वाम गठबन्धनले निर्वाचनमा स्पष्ट बहुमत ल्याएकोमा त्यसका नेतृत्वकर्ता नेकपा(एमाले)का अध्यक्ष केपी शर्मा ओलीलाई बधाई दिएका छन् । हमालले आगामी सरकारको नेतृत्व गरेर देशलाई स्थिरता, शान्ति र विकासको महा यात्रामा अगाडि बढाउन ओलीलाई शुभकामना दिएका हुन् ।
शनिवार ओली निवास बालकोट पुगेर हमालले अध्यक्ष ओलीको राष्ट्रियताको अडानले आम नेपालीहरु उत्साहित भएको बताए । अध्यक्ष ओलीले देश र जनताले आफूलाई गरेको विश्वास दिएको जिम्मेवारीबाट विमुख नहुन समेत उनले सुझाव दिए । ‘जनता र देशले मलाई जुन विश्वास र जिम्मेवारी दिएका छन् त्यसलाई म कुशलतापूर्व निर्वाह गर्नेछु’ ओलीले भने ‘देश र जनताका निम्ती मैले निर्वाह गरेको भूमिकाबाट कसैलाई पनि पछुतो हुने छैन ।’
ओलीले हमाल सामु हिरोहरुले फिल्ममा अभिनय मात्र नभएर देश बनाउनका लागि भूमिका निवार्ह गर्नुपर्ने सुझाव दिए । ‘देश निर्माणका लागि अभिनय मात्र होइन तपाईंहरुबाट साँच्चीकै सहयोगको अपेक्षा गरिएको छ’ ओलीले भने ।
शनिबारै केही कलाकारको समुहले लाजिम्पाट पुगेर माओवादी केन्द्रका अध्यक्ष पुष्पकमल दाहाललाई पनि बधाई तथा शुभकामना दिएका थिए ।
