‘डिग्री माइला’मा यस्तो छ दयाहाङको अवतार
रामबाबु गुरुङ निर्देशित ’डिग्री माइला’को पहिलो झलक सार्वजनिक भएको छ । बिहिबार सार्वजनिक पोस्टरमा अभिनेता दयाहाङ राईलाई एकल रुपमा प्रस्तुत गरिएको छ । दयाको फिल्ममा शिर्ष भूमिका छ ।
पोस्टरमा उनलाई काठको बेन्चीमा गम्भिर मुद्रामा केही सोचिरहेको अवस्थामा देख्न सकिन्छ । उनले चश्मा समेत लगाएका छन् । योसँगै उनलाई जुँगा पालेको पनि देख्न सकिन्छ । बाँसुरी फिल्मसको ब्यानरमा निर्माण भएको यो फिल्मले थर्ड डिभिजनमा मास्टर डिग्री पास गरेका एक शैक्षिक बेरोजगारको कथा पेस गर्छ । यही नाममाथि अभिनेता दयाको निर्देशनमा केही वर्ष अगाडि नाटकसमेत प्रदर्शन भइसकेको छ । सोही नाटकलाई फिल्मका रुपमा पर्दामा प्रस्तुत गर्न लागिएको हो । फिल्मले ’डिग्री माइला’को माध्यमबाट बेरोजगारीसँगै नेपाली समाजको चित्र पस्किनेछ ।
बाँसुरी फिल्मस् र कबड्डी फिल्मस्ले फिल्म निर्माणका लागि सुस्मा फिल्मस्सँग सहकार्य गरेको छ । फिल्म ले ’किन चाउरिस मरिच आफ्नै रागले’ भन्ने चर्चित नेपाली उखानलाई आफ्नो ट्यागलाइन बनाएको छ । फिल्म आगामी नेपाली नयाँ वर्षमा रिलिज हुनेछ ।
फिल्ममा दयासँगै आँचल शर्मा, विजय बराल, माओत्से गुरुङ, बुद्धि तामाङ, प्रकाश घिमिरे लगायतको अभिनय छ।