नयाँ फिल्म : आर्यन र दयालाई ‘गाउँ नै रमाइलो’
अभिनेताद्वाय आर्यन सिग्देल र दयाहाङ राई लामो समयपछि एकै पर्दामा प्रस्तुत हुने भएका छन् । निदेश राउतले निर्देशन गर्ने नयाँ फिल्म ‘गाउँ नै रमाइलो’ मा दया र आर्यन मुख्य भूमिकामा अनुबन्धित भएका हुन् ।
छविराज ओझाको लोफरपछि आर्यन र दयालाई गाउँ नै रमाइलो मा एकसाथ देख्न पाइने भएको हो । दया र आर्यनले लोफर अगाडी फिल्म ‘मेरो एउटा साथी छ’मा काम गरेका थिए । यी दुई नायकको टिमअपले दर्शकमाझ उत्साह पैदा गर्न सक्दछ । विकास सुवेदीको लेखन रहने फिल्ममा हिमाल कडरियाको लगानी रहनेछ । कडरियाले यस अगाडी नांगो गाउँ फिल्म निर्माण गरेका थिए भने निर्देशक राउतले मल्टिस्टारर ‘पुजार सार्की’ निर्देशन गर्दैछन् ।
फिल्म ‘गाउँ नै रमाइलो’लाई आउँदो बर्षको दशैंमा रिलिज गर्ने घोषणा समेत गरिएको छ । क्लक वार्क क्रियशनको ब्यानरमा निर्माण हुने फिल्मका अन्य कलाकारहरुको घोषणा विस्तारै गरिने निर्माण पक्षले बताएको छ । यो फिल्मको नेपाल वितरणको जिम्मा आरआर फिल्मस्ले लिएको छ । यस्तै, ओभरसिजमा एमएसएम इन्टरटेन्मेन्टले यो फिल्म वितरणको जिम्मा लिएको छ । फिल्मको छायांकन आउँदो बर्षको जेठबाट सुरु गर्ने योजना छ ।
निर्माता कडरियाले फिल्म ‘दुःखी आत्मा’ निर्माणको घोषणा पनि गरिसकेका छन् । दीपेन्द्र लामाले निर्देशन गर्ने यो फिल्ममा दयाहाङ राई फाइनल भइसकेका छन् ।
