सौगात मल्ल र प्रमोद अग्रहरीलाई लिएर ‘रक्तबीज’ बन्ने
फिल्म ‘रक्तबीज’ निर्माणको घोषणा भएको छ । निर्माता सञ्जय न्यौपानेले शुक्रबार थिम पोस्टर सार्वजनिक गर्दै फिल्मबारे जानकारी दिएका हुन् । फिल्ममा अभिनेताद्वाय सौगात मल्ल र प्रमोद अग्रहरी शीर्ष भूमिकामा प्रस्तुत हुनेछन् ।
यो फिल्ममा सौगात र प्रमोद सहित विशाल खरेल पनि देखिंदैछन् । खरेलले ‘प्रेम दिवस’बाट अभिनय यात्रा सुरु गरेका हुन् । फिल्मको छायांकन २०८१ सालको असोजबाट गरिने निर्माता न्यौपानेको भनाई छ । सञ्जय न्यौपाने प्रोडक्सनको ब्यानरमा निर्माण हुने फिल्ममा अमेरिकाको एलए ग्रुप र कमल खतिवडाको पनि लगानी हुनेछ ।
राम्रो टिम र पटकथा भएकाले फिल्ममा लगानी गर्न तयार रहेको निर्माता न्यौपानेले बताए । न्यौपानेले यसअघि ‘प्रेम दिवस’ फिल्म बनाएका थिए । फिल्ममा कथा, पटकथा तथा संवाद प्रदीप भारद्वाजको रहनेछ ।
अभिनेत्री सहितका अन्य कलाकार भने चाँडै निधो हुने जनाइएको छ । ‘डार्क एक्सन’ जनरामा फिल्मलाई सौरभ लामाले खिच्नेछन् । पूर्वी नेपालको इलाम र झापामा फिल्म छायांकन हुनेछ ।