प्रदीप खड्काको ‘प्याराडाइज’ मा ‘जवान’का सांगे
अभिनेता प्रदीप खड्काको निम्तोमा शाहरुख खान स्टारर ‘जवान’ फेम्ड बलिउड अभिनेता सांगे सेल्ट्रिम शनिबार काठमाडौं आइपुगेका छन् । प्रदीपको शीर्ष भूमिका रहने बलिउड फिल्म ‘ऐरी’ मा उनी रहने चर्चा छ ।
फिल्म ऐरी बारे छलफल, काठमाडौं घुमघाम र उनी समेत संलग्न भुटानको ओटीटी एप सांग्रिलामा नेपाली कन्टेन्ट पनि राख्ने बारे बजार सम्भाव्यताको खोजी गर्न सांगे नेपाल आएका हुन् । उनले शनिबार साँझ प्रदीपले सञ्चालनमा ल्याएको ‘प्याराडाइज’ रेस्टुरेन्टमा पुगेर लाइभ म्युजिकमा पनि भाग लिए । यसअघि भारतमा प्रदीप र सांगेबीच भेट भएको थियो ।
त्यतिबेला सांगेले तस्वीर सेयर गर्दै फिल्म ‘ऐरी’लाई शुभकामना समेत दिएका थिए । त्यतिबेलै उनी फिल्ममा जोडिने अड्कलबाजी काटिएको थियो ।
सांगे ‘ऐरी’मा जोडिने सम्भावना बलियो रहेको र आधिकारिक रुपमा अनुबन्धित भइसकेपछि सार्वजनिक गरिने प्रदीपले जानकारी दिएका छन् ।
आइतबार उनले चन्द्रागिरि डाँडा घुम्दैछन् । सैनिक सेवापछि सांगे मिस्टर भुटान बनेर भुटानी फिल्ममा समेत कहलिए । ‘जवान’को अभिनयले उनलाई थप चर्चा दिलाएको हो । उनी मंगलबार भारत फर्किने छन् ।
