’म्याउँ’ मार्फत उत्तम प्रधानको कमब्याक, मुख्य भूमिकामा अनुप
अभिनेता द्वय अनुप विक्रम शाही र उत्तम प्रधानको प्रमुख अभिनय रहने गरी ’म्याउँ’ बन्ने भएको छ । माघे संक्रान्तीको अवसर पार्दै यसको पहिलो भाग घोषणा गरिएको छ ।
फिल्ममा लेखन, निर्देशन तथा निर्माण जय राज रायको रहनेछ । जय मिडिया म्यानेजमेन्टको प्रस्तुतिमा बन्ने यस फिल्ममा प्रमुख भूमिकाको लागी अभिनेत्रीको भने तय हुंन बाँकी रहेको निर्देशक रायले बताए ।
मानसिक रूपमा विक्षिप्त अवस्थाको ’साइको किलर’, जसको आफ्नै समस्याग्रस्त अतित छ । उसले समाजमा देखाउने आफ्नो उपस्थिति र त्यसबाट उत्पन्न हुने परिस्थितिको कथामा यो फिल्म बन्न लागेको रायले बताए । उनले यस फिल्ममा ’ट्विस्ट एन्ड टन्र्ज’को भरपुर प्रयोग गरी शानदार अनुभव दिलाउन कुनै कसर बाँकी नराख्ने दाबी गरे ।
फिल्ममा दक्षिण भारतिय फिल्मकै प्रख्यात सिनेमाटोग्राफर आकाश कुमारको डिओपी रहने ’म्याउँ’ मा लक्ष्मण सुनारले एशोसियट निर्देशन तथा सम्पादन गर्नेछन् ।
भुटानी फिल्ममा अनुभव लिएका सुमन माझीको साउन्ड डिजाइन र सुदिप भण्डारीको भिएफएक्स रहनेछ । यसको विश्वव्यापी रिलिज लक्ष्य सन् २०२४ राखिएको छ ।