सौगात नाजिरको ‘अगस्त्य’ हेर्न हलमा दर्शक भरिए
एक सय भन्दा बढी हलहरुबाट प्रदर्शनमा आएको फिल्म ‘अगस्त्य च्याप्टर १’ को सुरुवाती व्यापार सुखद देखिएको छ । शनिबार फिल्मको अकुपेन्सी ८५ प्रतिशत माथि रहेको रिपोर्ट, जुन सुखद् हो ।
सौरभ चौधरीको लेखन तथा निर्देशनमा तयार भएको यो फिल्मलाई दर्शकले सकारात्मक प्रतिक्रिया दिइरहेका छन् । फिल्म हेरेका दर्शकले विशेषतः अभिनेता सौगात मल्लको अभिनयको प्रशंसा गरेका छन् । फिल्ममा सौगात मल्ल, नाजिर हुसेन, मलिका महत, प्रमोद अग्रहरीको मुख्य भूमिका छ ।
फिल्म रिलिज भएदेखि नै सौगात मल्ल, नाजिर हुसेन र मलिका महत राजधानीका हलहरुमा पुगेका छन् । कतिपय दर्शकले अगस्त्य च्याप्टर १ हेरेपछि फिल्मको दोश्रो भागको समेत माग गरेका भिडियो हेर्न सकिन्छ । यद्पी निर्माण पक्षले ‘अगस्त्य च्याप्टर २’ सन् २०२६ मा रिलिज गर्ने फिल्मको अन्त्यमा उल्लेख गरेको छ ।
डार्क हर्स इन्टरटेनमेन्ट र सेभेन सिज इन्टरटेनमेन्टको प्रस्तुति रहेको फिल्ममा सौगात, नाजिर, मलिका र प्रमोद सँगै बेन बस्नेत, विजय बराल, रवीन्द्र झा, शिशिर बाङ्देल, निश्चल बस्नेत, सिम्रन खड्का, प्रकाश दाहाल, प्रदीप ढकाल, गजेन्द्र त्रिपाठी, सचिन चन्द्रलगायतका कलाकारको अभिनय छ । संजय लामाको छायाँकन रहेको फिल्मका द्धन्द्ध निर्देशक श्री श्रेष्ठ हुन् ।
