‘उपहार’को उत्साहजनक सुरुवात, दर्शकमाझ पूजा र बेनिशा
शिवरात्रीको अवसर पारेर प्रदर्शनमा आएको फिल्म ‘उपहार’ले उत्साहजनक ओपनिङ गर्न सफल भएको छ । प्रदर्शनको पहिलो दिन शुक्रबारबाट नै फिल्मले हाउसफूलको व्यापार गरेको हो ।
राजधानीका सिभिल मल, अष्टनारायण हल, एफक्यूब, लबिम मल, नेपालगञ्ज लगायतका हलहरुमा शुक्रबार नै उपहारले ‘हाउसफूल’ को व्यापार गरेको हो । शनिबार पनि उस्तै रह्यो । शुक्रबार बिहानैबाट निर्देशक ज्ञानेन्द्र देउजा, अभिनेत्रीद्वय बेनिशा हमाल, पूजा शर्मा, अभिनेताद्वय मुकुन भुषाल, समर्पणजंग कार्की, कलाकार अंशु महर्जन लगायतको टिम उपत्यकाका हलहरुमा पुगेर दर्शकसँग भेटघाट गरेको थियो । फिल्मलाई दर्शकले सकारात्मक प्रतिक्रिया दिएका छन् ।
रेखा फिल्मस र कपनगढी सिनेमा प्रा.लिको व्यानरमा रेखा थापा प्रस्तुतकर्ता रहेको फिल्ममा ज्ञानेन्द्र देउजाको निर्देशन छ । विष्णु कल्पितको छायाँकन गरेको फिल्मलाई मित्र डि.गुरुङले सम्पादन गरेका हुन् । संगीत बबुल गिरी र अर्जुन पोखरेलले दिएका छन् ।
