‘अगस्त्य च्याप्टर १’ को ‘रोइ रहुँ जस्तो लाग्छ’ रिलिज

सौरभ चौधरीको लेखन तथा निर्देशनमा ‘अगस्त्य च्याप्टर १’ दोश्रो सातामा प्रदर्शन भैरहेको छ । दोश्रो सातामा फिल्मको नयाँ गीत सार्वजनिक गरिएको छ । गीत :

दोस्रो सातामा प्रवेश गरेको उपलक्ष्यमा निर्माण टिमले ‘रोइ रहुँ जस्तो लाग्छ’ बोलको गीत सार्वजनिक गरेको छ । एसडी योगीको स्वर तथा संगीत रहेको गीतमा राम अविरल विष्टको शब्द छ । दोश्रो सातामा पनि फिल्मप्रति दर्शको चासो देखिन्छ । देशकै ठूलो मल्टीप्लेक्स चेन क्यूएफएक्सका काठमाडौं र मोफसलका स्टेशन सहित बिग मुभिज्, वान् सिनेमाज्, सिडिसी सिनेमाज्, पोखराको मिडटाउन सिनेमाज्, धरानको फ्रेन्ड्स सिनेमाजमा पनि दर्शकको उपस्थिति दोस्रो सातामा पनि सुखद् देखिन्छ ।

डार्क हर्स इन्टरटेनमेन्ट र सेभेन सिज इन्टरटेनमेन्टको प्रस्तुति रहेको ‘अगस्त्य’ नेपाल रिलिजको पाँच दिनपछि विहिबारदेखि मध्यपूर्वका मुलुकमा प्रदर्शनमा आएको छ । अन्तर्राष्ट्रिय वितरण कम्पनी सेभेन सिजले यो फिल्मलाई युएई, कतार र बहराइनमा रिलिज गरेको छ । मध्यपूर्वका ठूला चेनहरु भक्स स्टार, सिने रोयल, सिनेपोलिस, सिनेको र नोभामा प्रदर्शन सुरु भएको छ । अन्य अन्तर्राष्ट्रिय बजारमा भने यो फिल्म नेपालसँगै प्रदर्शनमा आएको छ ।

फिल्ममा सौगात मल्ल, नाजिर हुसेन, मलिका महत, प्रमोद अग्रहरी, बेन बस्नेत, विजय बराल, रवीन्द्र झा, शिशिर बाङ्देल, निश्चल बस्नेत, सिम्रन खड्का, प्रकाश दाहाल, प्रदीप ढकाल, गजेन्द्र त्रिपाठी, सचिन चन्द्रलगायतका कलाकारको अभिनय छ । निर्माण पक्षले ‘अगस्त्य च्याप्टर २’लाई सन् २०२६ मा रिलिज गर्ने घोषणा गरेको छ ।