हर्क साम्पाङ र हरिवंशले धरानमा गरे ‘महाजात्रा’को प्रचार
फिल्म ‘महाजात्रा’ चैत ९ गतेदेखि प्रदर्शन हुँदैछ । फिल्म युनिट यतिबेला महाजात्रा प्रचारका लागि देश दौडाहामा छ । महाजात्रा युनिट मंगलबार धरान पुगेको थियो । जहाँ त्यहाँका मेयर हर्क साम्पाङ पनि उपस्थित थिए ।
मेयर साम्पाङले आउँदो वर्षदेखि फिल्म क्षेत्रलाई पनि बजेट छुटाउने बताए । फिल्म ‘महाजात्रासँग स्थानीय सरकार ः सिनेमा संवाद’ कार्यक्रममा नगरप्रमुख हर्क साम्पाङले उक्त कुरा बताएका हुन । ‘नेपाली फिल्मको बारेमा आफूले गम्भीर रुपमा सोचेको छु,’ मेयर साम्पाङले भने, ‘अबको फिल्मलाई लिएर बजेटमा राख्छु ।’साथै उनले नेपाली कला संस्कृतिको विकासमाआफू गम्भीर रहेको समेत बताएका छन् ।
अभिनेता हरिवंश आचार्यले नगरप्रमुख हर्क साम्पाङ को काम गर्ने शैलीको तारिफ गर्दै आफू प्रशंसक रहेको बताए साथै अभिनेता रवीन्द्रसिंह बानियाँले सरकारसँग आफूहरुले हातेमालोको आशा राखेको बताए । फिल्म छायांकनका लागि लोकेसनको खोजीमा सहजीकरण गर्न उनले आग्रह समेत गरे । अभिनेता विपिन कार्कीले छायांकन स्थलको लागि कहिलेकाहीं लफडा पर्ने बताए ।
अभिनेता रवीन्द्र झाले छायांकन स्टुडियो जरुरी रहेको बताए । अभिनेत्री वर्षा राउतले लोकेसनको खोजीमा उपमहानगरले सहजीकरण गर्नुपर्ने बताइन् । महिला कलाकारलाई फिल्म छायांकनमा असहज हुने भएकाले स्थानीय सरकारले समन्वय गर्नुपर्ने बताइन् ।
