चौथो सातामा ‘अगस्त्य च्याप्टर १’ को प्रदर्शन यात्रा
फिल्म ‘अगस्त्य च्याप्टर १’ प्रदर्शनको चौथो सातामा प्रवेश गरेको छ । सौरभ चौधरी एक्सन फिल्म राजधानी र मोफसलका दर्जन बढी पर्दामा चौथो सातामा प्रदर्शनरत छ ।
फिल्ममा सौगात मल्ल र नाजिर हुसैनको मुख्य भूमिका छ । साथमा मलिका महत, प्रमोद अग्रहरी लगायत अन्य कलाकारहरुले पनि अभिनय गरेका छन् । फिल्मको मेकिङ, कथावस्तु, कलाकारको अभिनय, एक्सनलाई दर्शकले निकै रुचाएको निर्माण टिमको भनाई छ । नेपालसँगै ओभरसिज बजारमा समेत प्रदर्शन भएको यो फिल्मलाई विदेशी दर्शकहरूले नेपाली फिल्म क्षेत्रमा नयाँ खालको कथामा उच्च मेकिङका साथ नयाँ स्वाद दिएको प्रतिक्रिया दिएका छन् । यो फिल्मले अष्ट्रेलिया, संयुक्त राज्य अमेरिका, क्यानडा लगायतका अन्य देशहरूमा समेत हाउसफुलको निरन्तरता पाइरहेको छ ।
दर्शकले ’अगस्त्य च्याप्टर १’ हेरेर निस्कँदै गर्दा फिल्मको अन्त्य तिर को हो गणेश ? भन्ने सस्पेन्सले दर्शकहरू माझ थप एक खालको चासोको विषय बनाइदिएको पाइन्छ । सौरभ चौधरीको लेखन तथा निर्देशन रहेको ‘अगस्त्य’लाई समीक्षकबाट कमजोर समीक्षा पाउँदा पनि फिल्मको व्यापार स्थिर रहनु निर्माण टिमले यसलाई आफ्नो जीतको रुपमा लिएको छ । विशेष गरी फिल्मले युवापुस्तालाई आकर्षण गरिरहेको छ ।
डार्क हरिस इन्टरटेनमेन्ट र सेभेन सिज इन्टरटेनमेन्टको प्रस्तुति रहेको फिल्ममा सौगात मल्ल, नाजिर हुसेन, मलिका महत, प्रमोद अग्रहरी, विजय बराल, रवीन्द्र झा, बेन बस्नेत, शिशिर वाङ्गदेल, सिम्रन खड्का, प्रकाश दाहाल, गजेन्द्र त्रिपाठी लगायतको अभिनय छ ।
दर्शकबाट पाएको सकारात्मक प्रतिक्रिया र व्यापार राम्रो भएपछि निर्माण पक्ष ’च्याप्टर २’का लागि उत्साहित भएको छ । जसलाई सन् २०२६ भित्र सार्वजनिक प्रदर्शन गर्ने जनाइएको छ ।
