दयाहाङ स्टारर ‘डिग्री माइला’को रमाइलो ट्रेलर रिलिज
अभिनेता दयाहाङ राईको शिर्ष भूमिका रहेको फिल्म ’डिग्री माईला’को ट्रेलर सार्वजनिक भएको छ । शुक्रबार प्रेसमिट गर्दै फिल्मको ट्रेलर सार्वजनिक गरिएको हो । रामबाबु गुरुङ निर्देशित फिल्म यही नेपाली नयाँ वर्षमा प्रदर्शन हुँदैछ । ट्रेलर :
सार्वजनिक ’डिग्री माइला’ को ट्रेलर करिब तीन मिनेट लामो छ । ट्रेलरमा अंग्रेजी शिक्षक नहुँदा झण्डै खारेजीको संघारमा रहेको एउटा क्याम्पस जोगाउन सक्ने एक मात्र पात्रका रुपमा दयाहाङलाई प्रस्तुत गरिएको छ । उक्त क्याम्पसको मान्यता जोगाउन क्याम्पस व्यवस्थापनको जोडबल र मरिच झैं पिरा स्वाभावमा उभिएका दयाको नोकझोकलाई कमेडी शैलीमा प्रस्तुत गरिएको छ ।
दयाहाङको केन्द्रीय भूमिकामा रहेका फिल्ममा अभिनेत्री आँचल शर्मा उनको प्रेमीका बनेकी छिन् । अभिनेत्री ऋचा शर्माको संवादसँगै फिल्मको ट्रेलर सुरु हुन्छ । फिल्ममा विजय बराल, माओत्से गुरुङ, बुद्धि तामाङ, प्रकाश घिमिरे लगायत अन्य कलाकारहरुको पनि अभिनय छ । फिल्मलाई बाँसुरी फिल्मस्ले कबड्डी फिल्मस् तथा सुस्मा फिल्मस्सँग मिलेर निर्माण गरेको हो ।
