शुक्रबारबाटै ‘महाजात्रा’को बम्पर ओपनिङ
प्रतिक्षित फिल्म ‘महाजात्रा’ले बम्पर ओपनिङ को गरेको छ । सर्वाधिक शो पाएको यो फिल्म हेर्न बिहानी शोदेखि नै दर्शक हलमा उर्लिएका छन् । अभिनेता बिपिन कार्की सहित फिल्म युनिट शुक्रबार विभिन्न हलहरुमा पुगेर साक्षत्कार गरिरहेको छ ।
फिल्मले शुक्रबार क्युएफएक्स अन्र्तगतका हलहरुमा मात्रै ७२ वटा शोहरु पाएको छ । सबै जसो शोहरु हाउसफूल रहेको रिपोर्ट छ । शनिबार सबै शो हाउसफूल हुने अपेक्षा छ । सोलो रिलिजको अवसर पाएको फिल्म देशका सबै जसो हलहरुमा प्रदर्शनरत छ । लेखक, निर्देशक तथा निर्माता प्रदीप भट्टराईले फिल्मप्रति दर्शकले देखाएको उत्साहप्रति सबैलाई धन्यवाद दिएका छन् ।
‘महापुरुष’को सफलता पश्चात् भट्टराई महाजात्रा लिएर आएका हुन्, जसमा उनी सफल देखिएका छन् । अघिल्ला जस्तै यो सिरिजमा पनि पैसा लुकाउने (जात्रै जात्रामा सुन) तीन पात्रको रोचक यात्रालाई निरञ्तरता दिइएको छ । जसमा फडिन्द्र (बिपिन कार्की) जोयस (रविन्द्रसिंह बानियाँ) मुन्ना (रविन्द्र झा) खरो रुपमा उत्रिएका छन् । जात्राको यो सिरिजमा अभिनेता हरिवंश आचार्य राजनीतिक भिलेनमा रुपमा भित्रिएका छन् । अभिनेत्री बर्षा राउत, कलाकार दिव्यदेव, गौमाया, बाल कलाकार अरविन्द्र खड्काले मन छुने अभिनय गरेका छन् ।
षट्कोण आर्टस्को प्रस्तुती रहेको फिल्म महाजात्रा का कार्यकारी निर्माता रविन्द्रसिंह बानियाँ हुन् । निर्मातामा म्याक्स दिपेश खत्री र उज्ञश्वर पौडेल छन् । पुरुषोत्तम प्रधानको छायाँकन रहेको फिल्ममा मित्र डि.गुरुङको सम्पादन छ ।
पोस्टर डिजाइन रोयल भिमसेनले गरेका हुन् । सम्भवतः यो वर्षको सबैभन्दा बढी ओपनिङ गर्ने फिल्ममा ‘महाजात्रा’ पर्ने देखिएको छ ।
