नेपाल आइन् मलिकाजान उर्फ मनिषा (फोटो एल्बम)
अभिनेत्री मनिषा कोइरालाको शिर्ष भूमिका रहेको नेट्फिल्क्स सिरिज यतिबेला चर्चामा छ । सञ्जयलीला भन्साली निर्देशित नेटफ्लिक्स वेब सिरिज ‘हीरामण्डी’ मा मनिषाले निर्वाह गरेको मलिका जानको भूमिकालाई रुचाइएको छ ।
उनै मलिकाजान उर्फ मनिषा कोइराला आइतबार राति काठमाडौं आइपुगेकी छन् । मनिषाको स्वागतमा निर्देशकद्वाय दिनेश डिसी, सम्झना रौनियार उप्रेती र केही मिडियाकर्मी इयरपोर्टमा उपस्थित थिए । विमानस्थलमा उनले मिडियासँग संक्षिप्त कुराकानी समेत गरिन् । उनले ‘हीरामण्डी’लाई आफ्नो कलाकारिता जीवनको दोस्रो जीवन भएको बताइन् ।
‘आधारभूत रुपमा दोस्रो जीवन क्यान्सर निको भइसकेपछि भनेको हो । हीरामण्डीले करिअरमा सेकेन्ड लाइफ दिन सक्छ भनेर भनेको हो । राम्रो निर्देशकसँग राम्रोसँग काम गर्न पाउँदा खेरि धेरै मान्छेले स्याबासी दिएपछि सेकेन्ड लाइफजस्तो भएको छ,’ उनले भनिन् ।
यस्तै विवाह बारे सोधिएको प्रश्नमा उनले घुमाउरो जवाफ दिइन् । ‘म धेरै प्लान गर्दिनँ । राम्रो काम आयो भने गर्छु । नत्र म जंगलमा हिंडेर रमाउने मान्छे हो,’ उनले भनिन् । यद्पी उनले आफूलाई सम्हाल्न सक्ने व्यक्तिको खाँचो रहेको भने बताइन् ।
‘हिरामण्डी’ रिलिज पश्चात् निर्देशक भन्सालीसँगको भेट र कुराकानी बारे मनिषाले भनिन्, ‘मलाई तिमीले २८ वर्ष कुरायौं । अब अरु २८ वर्ष चाहिं नकुराउनु भनेको थिएँ । उहाँसँग काम गर्न पाउँदा खुसी लाग्छ । म गर्व गर्छु’।
तस्बिर : उद्धव रसाईली
