गाउँ आएको बाटोको टिजर रिलिज

जेठ २५ गतेबाट प्रदर्शनमा आउने फिल्म ‘गाउँ आएको बाटो’को टिजर रिलिज गरिएको छ । नविन सुब्बा निर्देशित फिल्ममा दयाहाङ राई, पशुपती राई र प्रशन राईको मुख्य भूमिका छ । टिजर :

सोमबार काठमाडौंमा एक कार्यक्रम आयोजना गर्दै निर्माण पक्षले टिजर सार्वजनिक गरेको हो । सार्वजनिक टिजरमा गाउँले जीवन, उकाली ओरोली, सहरप्रतिको बालकको जिज्ञासा र गाउँमा सडक पुग्दाको खुसी समेटिएको छ । टिजरले सिनेमाको सारांश बुझाउने प्रयास गर्दै परम्परागत जीवनशैली र आधुनिक परिवर्तनबीचको संघर्ष फिल्मको कथा भन्ने संकेत गरेको छ ।

फिल्मको टिजर सार्वजनिक कार्यक्रममा बोल्दै अभिनेता दयाहाङ राईले फिल्मले गाउँमा गाडी सँगै धेरै कुरा आएको र त्यसपछि त्यसैले गाउँबाट धेरै कुरा लगेको पनि बताए । ‘गाउँमा गाडी बाटो आयो बाटोसँगै गाडी आयो । त्यसले गाउँबाट धेरै कुरा लग्यो होला भन्ने लाग्छ,’ उनले भने, ‘यही कुरा नै यो सिनेमाको कथाले भन्ने प्रयास गरेको छ । गाउँमा सडक पुगेपछिको कथा र परिवर्तन यो सिनेमाले भन्नेछ ।’

उनले विश्वका धेरै महोत्सवमा पुगेर विश्वभरका दर्शकको माया पाएको सिनेमाले अब स्वदेशी दर्शकको पनि माया पाउनेमा अपेक्षा र विश्वास रहेको बताए । ‘हामीले विश्वभरका दर्शकको माया पाइसकेका छौँ । अब हाम्रा नेपाली दर्शकको पनि त्यस्तै माया पाउने आशा छ,’ उनले भने ।

फिल्म ‘गाउँ आएको बाटो’ विश्वका प्रतिष्ठित फिल्म महोत्स्वहरुमा सहभागी भैसकेको छ । फिल्मको पटकथा लेखनमा निर्देशक सुब्बासँग महेश राईले सहकार्य गरेका छन् । छायाँकन जोश हेरुमले गरेका हुन् ।

मेन्छेम पिक्चर्स र बासुरी फिल्मसको संयुक्त प्रस्तुतीमा निर्माण भएको फिल्म ‘गाउँ आएको बाटो’ले एउटा गाउँको सडक यात्राको कथा भन्छ ।