दुई नम्बर ट्रेन्डिङमा ‘कार्साङ’को ट्रेलर
फिल्म ‘कार्साङ’ पौष २६ गतेबाट प्रदर्शनमा आउँदैछ । फिल्मको ट्रेलरलाई दर्शकले रुचाएका छन् । सार्वजनिक भएको २४ घण्टामै ट्रेलर ट्रेन्डिङको दुई नम्बरमा रहि आएको छ । मुभी सेक्सन अर्न्तगत् दोश्रो नम्वर ट्रेन्डिङमा रहेको ट्रेलरलाई एघार लाख बढीले हेरेका छन् । ट्रेलर :
एक नम्बरमा सलमान खानको ‘सिकन्दर’को टिजर छ । ‘सिकन्दर’को टिजरसँग ‘कार्साङ’को ट्रेलरले प्रतिस्पर्धा गरिरहेको छ । ‘कार्साङ’को ट्रेलरमा दर्शकको आकर्षण देखिएको छ । वर्षकै राम्रो ट्रेलर भन्दै फिल्मले पनि त्यस्तै सफलता पाउने प्रतिक्रिया युट्युबमा आइरहेको छ । फिल्म ब्लकबस्टर हुने प्रतिक्रिया युट्युबको कमेन्टमा देखिरहेको छ ।
अर्ग्यानिक कथामा साधा जीवन शैली ट्रेलरमा देखिएको भन्दै फिल्म पनि त्यस्तै रहेको विश्वास धेरैले गरिरहेका छन् ।
ट्रेलरले पाएको यो माया फिल्मले पनि पाउने अपेक्षा फिल्म निर्माण पक्षको छ । “यही तहको माया हामीले सिनेमा हलमा दर्शकबाट पनि अपेक्षा गरेका छौँ,” निर्देशक यम शेर्पाले भने, “दर्शकले देखाउनु भएको यो माया र अपेक्षा पूरा हुनेगरी हामीले चलचित्र बनाएका छौँ ।”
फिल्म ‘कार्साङ’ यम शेर्पाको डेब्यु निर्देशन हो । ‘कार्साङ’ ग्रामीण परिवेशमा आधारित पारिवारिक कथावस्तुमा केन्द्रित रहेको निर्देशक शेर्पाले बताएका छन् ।
फिल्म ‘कार्साङ’मा दयाहाङ राई, सिर्जना निङलेखुसँगै जितु नेपाल, दीया मास्के, बुद्धि तामाङ, सृष्टि गौतम, डोमा ह्योल्मो, प्रेम लोप्चन र सुरवीर पण्डित लगायत कलाकारको अभिनय रहेको छ ।
यार्सा फिल्म्स र पुरुषोत्तम प्रधान फिल्मसको प्रस्तुतिमा बनेको यो चलचित्रका निर्माता तथा छायांकार पुरुषोत्तम प्रधान हुन् । सह–निर्मातामा गोविन्द बोहरा छन् । कार्यकारी निर्माताको रूपमा आङछिरिङ शेर्पाले काम गरेका छन् ।
