प्रिमियरमा ‘राज्जा रानी’ को प्रशंसा (फोटो/भिडियो)
फिल्म ‘राज्जा रानी’ लाई प्रिमियरमा प्रशंसा मिलेको छ । बुधबार साँझ दरबारमार्गस्थित क्युज हलमा आयोजना गरिएको प्रिमियर शोमा सहभागीले फिल्मको कथावस्तु तथा कलाकारको प्रस्तुती विशेष लागेको बताए । प्रिमियरको भिडियो हेर्नुस् :
फिल्म ‘राज्जा रानी’ ले विशेषतः तराई भेगमा व्यप्त दाइजो प्रथा, त्यहाँ छोरी बुहारीले पाउने दण्ड र यसको सजाय बारे विषय उठान गरेको छ । फिल्मको शिर्ष भूमिकामा प्रस्तुत भएका नायक नाजिर हुसेन र नायिका केकी अधिकारीको अभिनय मन छुने छ । सहायक पात्रहरु दिपक क्षेत्री, कामेश्वर चौरसिया, संगीता नापित जस्ता कलाकारले पनि आफ्नो भूमिकालाई न्याय गरेका छन् । नायिका रेखा थापालाई विशेष भूमिकामा देख्न सकिन्छ ।
याम थापाको लेखन तथा निर्देशन रहेको ‘राज्जा रानी’ आफुलाई मन परेको प्रतिनिधि सभा सदस्य लाल बाबु पण्डितले बताए । यस्तै निर्देशक दिपाश्री निरौलाले फिल्ममा कलाकारको अभिनय राम्रो रहेको र त्यसमा पनि रानी अर्थात् केकी अधिकारीले अब्बल अभिनय गरेको बताइन् ।
रमेश एमके पौडेल निर्मित फिल्म ‘राज्जा रानी’ यही शुक्रबारदेखि नेपाली र मैथिली भाषा गरी देशभरका हलहरुमा रिलिज हुँदैछ । निर्माता पौडेल भने यतिबेला अमेरिकामा छन् ।
