‘म इगो राखेर काम गर्दिन’ : प्रियंका कार्की

नायिका प्रियंका कार्कीलाई सिमित क्याम्प र सिमित सर्कलमा हिट भएकी नायिका भनेर फिल्म क्षेत्रमा टिप्पणी गर्ने गरिन्छ । हुन् पनि हो ‘नाईं नभन्नू ल’ र ‘छक्का पञ्जा’ को सिरिज बाहेक प्रियंका अभिनित अन्य फिल्महरुले व्यापारिक रेकर्ड कायम गर्न सकेका छैनन् । प्रियंका सोलो नायिका भएर अभिनय गरेका फिल्महरु औषत र फ्लप छन् । यस बारेमा के भन्छिन् त प्रियंका ?

आईतबार आयोजना गरिएको फिल्म ‘बटरफ्लाई’ को प्रेसमिटमा प्रियंकाले उल्लेखित प्रश्नको जवाफ दिदैं भनिन्, ‘हो म हरेक जसो ब्यानरमा दोहोरिन्छु । यसमा मलाई खुसी लाग्छ । म कोहीसँग पनि ईगो राखेर काम गर्दिनं ।’ प्रियंका थप्छिन्, ‘कुनै पनि ब्यानर तथा सर्कलसँग दोहोरिएर काम गर्नु नराम्रो होइन् । जब म कुनै ब्यानरमा दोहोरिन्न त्यो दिन चाहिं म सोच्छु कि मबाट त्यस्तो के गल्ती भयो ?’

यस्तै फिल्म, कार्यक्रम र म्युजिक भिडियोको व्यस्तता बारे प्रियंकाले भनिन्, ‘कुनै पनि कलाकारले छानेर काम गर्ने अवस्था छैन । फिल्म क्षेत्र सानो छ । त्यसकारण बर्षमा एक मात्र फिल्म खेलेर बस्न असम्भव छ ।’ एउटा फिल्म वापत् ११ करोड रुपैयाँ पारिश्रमिक पाए मात्रै वर्षमा एउटा फिल्म खेल्न सकिने प्रियंकाको कथन छ ।

पुष २८ गते रिलिज हुने ‘बटरफ्लाई’ सहित प्रियंका अभिनित यो साल मात्रै ‘ह्याप्पी डेज’ र ‘सत्रु गते’ गरी तीन फिल्महरु प्रदर्शनको पर्खाइमा छन् । ‘बटरफ्लाई’ मा प्रियंकाको अपोजिटमा नायक आर्यन अधिकारी प्रस्तुत भएका छन् ।