गोपिकृष्णमा देखिएको अनमोलको क्रेज (फोटो/भिडियो)
प्रदर्शनको दोश्रो दिन युवा स्टार अनमोल केसी हल गएका छन् । अनमोल प्रहरी र सुरक्षागार्ड सहित शनिबार चावाहिलको गोपिकृष्ण र बालाजुको अष्टनारायण हल पुगेका हुन् । अनमोलको साथमा नायिका अदीति बुढाथोकी पनि हल गएकी थिइन् ।
डेढ वर्षपछि कृ मार्फत दर्शकमाझ आएका अनमोल हल पुग्दा फ्यानबाट न्यानो स्वागत पाए । विशेषतः केही फ्यानहरु अनमोललाई देख्दा ‘ओएमजी’ मुडमा प्रस्तुत भए । केही केटी फ्यानले आँखाबाट आँसु समेत झारे । हेर्नुस् भिडियो :
अनमोलले गोपिकृष्ण हलमा दर्शकलाई राष्ट्रिय गाना गाउँन अनुरोध गर्दै आफुले समेत गाए । दर्शकलाई ‘धेरै माया छ’ भन्दै उनले धन्यवाद दिए । सुवास गिरी र भुवन केसीले निर्माण गरेको ‘कृ’ ले शनिबार देशका अधिकाशं हलमा हाउसफूल दर्शकको साथ पाएको छ ।
सुरेन्द्र पौडेल निर्देशित रिभेञ्ज लभ स्टोरी ‘कृ’ मा अनमोल र अदीतिसँगै अभिनेता सरोज खनाल, अभिनेत्री रुपा राना, कलाकार अनुपविक्रम शाही, कामेश्वर चौरसिया लगायतको अभिनय छ ।
पहिलो पटक एक्सन अवतारमा प्रस्तुत भएका अनमोललाई उनका फ्यानले रुचाएका छन् । फिल्ममा पुरुषोत्तम प्रधानको छायाँकन र चन्द्र पन्तको द्धन्द्ध निर्देशन छ । फोटो तथा भिडियो : उद्धव रसाईली
