जन्मदिन विशेष : पूर्णविक्रमको स्टार बन्ने यात्रा
स्टार नायक पल शाहको आज (बुधबार) जन्मदिन हो । युवा युस्ताका ढुकढुकी पललाई सामाजिक सञ्जालमा धेरैले जन्मदिनको कामना दिइरहेका छन् । कम उमेरमै स्टार बनेका पल को हुन् र कहिले बाट बने चर्चित ? हामीले छोटकरीमा पललाई नजिकबाट नियालेका छौं ।
स्थायी घर दाङ भएका पलको वास्तविक नाम पूर्णविक्रम शाह हो । पूर्ण हुँदा पल मोडल या फिल्मको हिरो थिएनन् । आर्मी बन्ने सपना पालेका पूर्ण ‘एडिटर’ थिए । म्युजिक भिडियो सम्पादन गर्दा गर्दै पल बनेर पूर्ण मोडल भए । मोडलिङ सुरु गरेपछि पल एकाएक सबैको रोजाइको मोडल बन्न गए । सुनिल गिरीको गीत ‘को होला त्यो’ भिडियोमा मोडलिङ गरेपछि पल रातारात स्टार बने । ‘हनी बनी’ रिलिज पछि त पल म्युजिक भिडियोका ‘राजा’ कै रुपमा चिनिए । भिडियो हेर्नुस :
म्युजिक भिडियोका स्टार पलको डेव्यु फिल्म ‘नाईं नभन्नू ल ४’ नै सुपरहिट बन्यो । दोश्रो फिल्म ‘म यस्तो गीत गाउँछु’ ले सोही सफलतालाई पछ्ययो । तेश्रो फिल्म ‘जोनी जेन्टलम्यान’ बाट सफलतामा लागेको ब्रेकलाई पल चौथो फिल्म ‘सत्रुगते’ बाट फर्काउने तयारीमा छन् । हाँस्य क्षेत्रका स्टारको अभिनय रहेको ‘सत्रुगते’ मा पल र आँचल शर्माको अभिनयले थप प्रतिक्षित बन्न गएको छ । यिनै युवा पुस्ताका चर्चित नायक पल शाहलाई जन्मदिनको मुरी मुरी शुभकामना !
