प्रेस शोमा ‘पञ्चेबाजा’को प्रशंसा, प्रदर्शनमा ‘साढे ७’ पनि
आज (फागुन ११) देखि प्रदर्शनमा आएको फिल्म ‘पञ्चेबाजा’ले प्रशंसा पाएको छ । शुक्रबार गरिएको प्रेस शोमा घनश्याम लामिछाने निर्देशित फिल्मले प्रशंसा पाएको हो ।
प्रदीप भारद्वाजको स्क्रिप्ट रहेको ‘पञ्चेबाजा’ को विशेषतः कथा वस्तु र कलाकारको प्रस्तुतीलाई रुचाइयो । ‘फिल्म सोचे भन्दा राम्रो रहेछ’, फिल्म हेरेपछि एक सञ्चारकर्मीले भने, ‘यसमा निर्देशकको काम देखिन्छ ।’ फिल्ममा अभिनेता सौगात मल्ल, कर्म, सृजना सुब्बा, बुद्धि तामांग र जस्मिन श्रेष्ठको मुख्य भूमिका रहेको छ । हरी घलेलामाको छायाँकन रहेको फिल्ममा विकास चौधरीको संगीत र कविराज गहतराजको कोरियोग्राफी छ । प्रोमो हेर्नुस् :
प्रचार प्रसार व्यापक नभएपनि फिल्मले पाएको प्रशंसाले दर्शक हलमा तान्नेमा निर्माण पक्ष विश्वस्त देखिएको छ । ‘पञ्चेबाजा’सँगै शुक्रबार देखि साम्तेन भुटियाले निर्देशन गरेको फिल्म साढे ७ पनि प्रदर्शनमा आएको छ । फिल्ममा सत्यराज आचार्य, कामेश्वर चौरसिया र मेनुका प्रधान मुख्य भूमिकामा प्रस्तुत भएका छन् ।
