गीतसंगीत चोरी आरोपमा अल्मोडाको ह्याट्रिक
गायक तथा संगीतकार अल्मोडा राना उप्रेतीलाई तेश्रो पटक गीत तथा संगीत चोरीको आरोप लागेको छ । यसअघि ‘फन्टास्टिक वन्डरफुल’ र पुरानो लोकगीत ‘पानी पर्याे असिना झर्याे’ चोरीको आरोप खेपेका अल्मोडाले ‘कृ’ को ‘उकालीमा पछि पछि’ सँगै सँगै चोरीको आरोपमा ह्याट्रिक गरेका छन् ।
वरिष्ठ निर्माता तथा निर्देशक शम्भु प्रधान आफ्नो फिल्म ‘सम्झना’ को गीत कृमा चोरी गरिएको भन्दै प्रहरीमा उजुरी दिन पुगेका छन् । ‘कृ’ को उक्त गीतमा ओरिजिनल म्यूजिक भनेर रञ्जित गजमेरलाई क्रेडिट दिइएको छ भने रिमेक म्युजिकमा अल्मोडा राना उप्रेतीको नाम छ । यसैगरी रिमेक लिरिक्समा अल्मोडा र सविन एकतारेको नाम छ । सम्झनाको गीत हेर्नुस् :
सम्झनाको ‘उकालीमा अघि अघि’ बोलको गीतलाई विना अनुमति ‘कृ’ मा समावेश गरिएको उनले आरोप छ । ‘कृ’ का निर्माता भुवन केसी र सुवास गिरीविरुद्ध उजुरी लिएर करिब १० दिनअगाडि शम्भु महानगरीय प्रहरी परिसर टेकु पुगेका थिए । तर, डिएसपी मोहन थापाले उजुरी दर्ता नगरी दुवै पक्षलाई बोलाएर मिलाउने प्रयास गर्दै आएका छन् । ‘कृ’ को गीत हेर्नुस् :
शम्भुले भुवन र सुवाससँग बारम्बार कुराकानी गरेपनि सहमती नभएपछि गीत चोरी भएको प्रहरीमा उजुरी दिएका हुन् । गीत राखिए वापत ‘कृ’ टिमको एक लाख दिने प्रस्तावलाई शम्भुले अस्विकार गरे । उनले ‘कृ’ ले कमाएको व्यापार मध्ये आधा आफुले पाउनु पर्ने दाबी गरेका छन् ।
निर्माता भुवन केसीको प्रस्तावमा ‘कृ’ मा सम्झनाको गीतको सानो अंश राखिएको निर्माता सुवास गिरीको भनाई छ ।
