असारदेखि द भ्वाईस सुरु, यी हुनेछन् निर्णायक
विश्व माझ चर्चित गायन रियालिटी शो ’द भ्वाईस’को नेपाली फ्रेन्चाइज ’द भ्वाईस अफ नेपाल’ सुरु हुने भएको छ । आइतवार राजधानीको पाँच तारे होटलमा एक कार्यक्रम गर्दै ’द भ्वाईस अफ नेपाल’ को औपचारिक घोषणा गरिएको हो ।
असारदेखि प्रशारण प्रारम्भ हुने ’द भ्वाईस अफ नेपाल’ लाई नेपाल आइडल निर्देशन गरेका लक्ष्मण पौडेलले निर्देशन गर्नेछन् गर्दैछन् । प्रल्हादसिंह ठकुरी एमडी रहेको उक्त रिलायाली शोमा फिरोज तिमल्सिना प्रमुख सहायक निर्देशकको रुपमा रहेका छन् । नेपाल आइडल होस्ट गरेका सुशिल नेपालले होस्ट गर्ने उक्त शोको निर्णायकको रुपमा बरिष्ठ गायक दीप श्रेष्ठ, प्रमोद खरेल, सनुप पौडेल र अभया सुब्बा रहने छन् ।
‘द भ्वाईस अफ नेपाल’ को विजेतालाई ‘भ्वाईस अफ नेशन’ घोषणा गरिने छ । विजेताले २५ लाख नगद, नयाँ कार, बीस लाख बराबरको भिडियो एल्बमको समझौता तथा वल्ड टुरको अवसर प्राप्त गर्नेछन् ।
आयोजकको भनाई अनुसार इतिहासमा नै पहिलो पटक उक्त नेपाली शो अन्तराष्ट्रिय प्लाटफर्ममा समेत जानेछ । केहि शोहरु ‘द भ्वाईस ग्लोबल’ नामक भिडियो च्यानलमा प्रशारण हुनेछ जहाँ संसारभरका प्रतिभालाई अटाईएको छ ।
