बिपिन कार्कीको ‘काजी’लाई ‘पोष्टाम’ले बजार प्रवद्र्धन गर्ने
फिल्म ‘काजी’ को सामाग्रीलाई ‘पोष्टाम’ नामक अनलाइन प्लेटफर्मले विश्वभर पुर्याउने भएको छ । गत बिहीबार ‘पोष्टाम’का सीइओ रोनिस दाहाल र फिल्मका निर्देशक लक्ष्मण रिजालबीच सम्झौता पत्रमा हस्ताक्षर भएको हो ।
‘पोष्टाम’ले ५० लाख बराबर फिल्मको विश्वव्यापी बजार प्रवर्द्धन निःशुल्क रुपमा गर्नेछ । निर्देशक रिजालले फेसबुक, टिकटकमा प्रचारका लागि गर्नुपर्ने खर्चको समाधानको रुपमा आफूले ‘पोष्टाम’लाई लिएको बताए । त्यस्तै, ‘पोष्टाम’का सीइओ दाहालले यो सामाजिक सञ्जाल मात्र नभइ एउटा ‘एफिलेट’ प्लेटफर्मको रुपमा अगाडि बढाएको बताए । यसलाई फेसबुक जस्तै गरी प्रयोग गर्न सकिने पनि उनले प्रष्ट्याए । तर, यो ‘एफिलेट’ प्लेटफर्म पनि भएकाले फिल्मजस्ता भिडियो कन्टेन्टलाई ल्याएर त्यसको बजार प्रवर्द्धन गरिने उनको भनाई छ । फिल्मको बजार प्रवर्द्धन विश्वव्यापी हुने उनले जानकारी दिए ।
आगामी माघदेखि छायांकन सुरु हुन लागेको फिल्ममा विपिन कार्की, वर्षा सिवाकोटी, विजय बराल, बुद्धि तामाङ, सुमन कार्की र कैलाश कार्कीको अभिनय रहनेछ । रिजाल एन्ड रिजाल प्रोड्क्सनको ब्यानरमा निर्माण हुन लागेको फिल्मको निर्मातामा रामप्रसाद रिजाल रहेका छन् ।
सुनिल मानन्धरको श्रीराम बालाजी पिक्चर्सले वितरण गर्ने फिल्मको छायांकन बेलायतमा गरिने जनाइएको छ ।
