‘पशुपति प्रसाद ३’ निर्माण गर्ने घोषणा
फिल्म ‘पशुपति प्रसाद २ : भष्मे डन’को तेस्रो श्रृंखला निर्माण घोषणा गरिएको छ । तिहार अगाडी प्रेसमिट गर्दै निर्माण पक्षले ‘पशुपति प्रसाद ३’को निर्माण घोषणा गरेका हो ।
लेखक तथा निर्माता खगेन्द्र लामिछानेले एक र दुईमा अपुरा छाडिएका पात्रको कथा पूरा गर्नुपर्ने भन्दै ‘पशुपति प्रसाद ३’ निर्माण गर्ने बताए । फिल्ममा खगेन्द्रको कथा लेखन र दीपेन्द्र के.खनालको निर्देशन रहनेछ । टुकी आर्ट्सको ब्यानरमा बन्ने फिल्ममा रोजिना सिटौला निर्माता रुपमा रहेकी छन् ।
‘पशुपति प्रसाद र पशुपति प्रसाद २ हेरेपछि दर्शकले ‘पशुपति प्रसाद ३’ कहिले आउँछ भनेर हामीलाई प्रश्न गर्नुभयो । हामीलाई पनि लाग्यो ती सिनेमामा छाडिएका अपूरा कथा र पात्रको कथा हामीले ‘पशुपति प्रसाद ३’ मा पूरा गर्नुपर्छ ।’ निर्माण टिमले जारी गरेको विज्ञप्तिमा उल्लेख गरिएको छ । फिल्मको तेस्रो श्रृंखलामा अभिनेता खगेन्द्र लामिछाने र नाकिया वर्षा सिवाकोटी दोहोरिने छन् ।
फिल्मलाई आगामी वर्ष छायांकन गरेर सोही वर्ष हलमा रिलिज गर्ने तयारीमा निर्माण टिम रहेको छ । लेखक लामिछानेले तेस्रो सिक्वेललाई तर्कसंगत, न्यायोचित र सुन्दर बनाउन प्रयास गर्ने बताए ।
फिल्म पशुपति प्रसाद २ : भष्मे डन अझै पनि केही हलहरुमा प्रदर्शनरत छ । फिल्मले दर्शकबाट मिश्रित प्रतिक्रिया पायो ।
