‘पर्खी बसें तिमीलाई’ मा ‘कालो चस्मा’को रिमेक भर्सन
सुपरहिट गीत ‘कालो चस्मा लाउ है मैया’ लाई रीमेक गरिएको छ । निर्देशक दीपक श्रेष्ठले नयाँ फिल्म ‘पर्खी बसें तिमीलाई’ मा उक्त गीतलाई समावेश गरेका हुन् । उक्त गीत सार्वजनिक गर्दै उनले फिल्म पौष २७ मा प्रदर्शन गरिने जानकारी दिए।
सार्वजनिक गीत ‘कालो चस्मा’ फिल्म ‘बादलपारी’ मा समावेश लोकप्रिय गीत हो । यसको रीमेकमा सुरेन्द्र राणाकै शब्द र शम्भुजित बाँस्कोटाको सङ्गीत रहेको छ । गीतलाई गायक प्रमोद खरेल र गायिका मिलन नेवारले गाएका छन् । ‘यो विसुद्ध प्रेम कथानक फिल्म हो । त्यसैले यसको सुरुवात गीत मार्फत गरेका छौँ’, निर्देशक श्रेष्ठले भने,‘पर्खी बसें झैँ यसमा पनि नयाँ कलाकारलाई लिएर काम गरेको छु । उहाँहरूलाई फिल्म उद्योगले स्वागत गर्नेमा विश्वस्त छु ।’
यो फिल्मबाट नायक किरण श्रेष्ठ र नायिका रक्षा बुढाथोकीले डेब्यु गर्दैछन् । उनीहरू दुईले अभिनय सिकेर फिल्ममा डेब्यु गर्न लागेका हुन् । आफूले सुन्दै हुर्किएको गीतमा नृत्य गर्न पाउँदा निकै खुसी लागेको अभिनेत्री रक्षाले बताइन ।
‘दीपक सर जस्तो लिजेन्ड निर्देशकको एक्सन कटमा काम गर्न पाए । निकै उत्साहित छु । आफू सुहाउँदो भूमिकामा प्रस्तुत भएको छु’, किरणले भने ।
