मुर्हत : अनमोल जसितासँग जोडी बाँधेर फिल्ममा फर्किए
फिल्म ‘फर्की फर्की’ को शुक्रबार ललितपुरको बंगलामुखी माई मन्दिरमा शुभ साइत गरिएको छ । अनमोल केसी र जसिता गुरुङ स्टारर फिल्मको छायांकन मंसिर ११ गतेबाट पोखरामा सुरु हुनेछ ।
फिल्मको मुर्हत समारोहमा कलाकार, निर्माता, निर्देशक र प्राविधिकहरुले पूजा गरेका थिए । फिल्मका प्रोडक्शन हेड शंकर पाण्डेले क्ल्याप हान्दै शुभसाइत भएको घोषणा गरे ।नायक अनमोल केसीले भने ‘फिल्म भनेको टेबलमा बन्छ । यो फिल्म पनि टेबलमै तयार भैसकेको छ । दर्शकले लभ स्टोरी फिल्ममा एउटा नयाँ स्वाद पाउनु हुनेछ । यो मेरो करिअरको नयाँ यात्रा पनि हो’ अनमोलले भने ।
यस्तै, नायिका जसिता गुरुङले एउटा उत्कृष्ट लभ स्टोरी फिल्ममा काम गर्न पाउँदा खुशी लागेको बताइन् । उनले, अनमोल केसीसँग बल्ल जोडी जम्न लागेको भन्दै दर्शकले थुप्रै सरप्राइज पाउने बताइन् । फिल्मका निर्माता रोहित अधिकारीले एउटा ठूलो क्यानभासमा उत्कृष्ट लभ स्टोरी फिल्म बनाउने बताए ।
यस्तै, फिल्मका निर्देशक सुयोग गुरुङले ‘फर्की फर्की’को कथाले दर्शकलाई लभ स्टोरी फिल्ममा नै नयाँ स्वाद दिने तर्क गरे । फिल्मका नव कलाकारद्धय रवि र समृद्धीले पनि एउटा राम्रो टिमसँग काम गर्न पाएकोमा उत्साह व्यक्त गरेका थिए । ‘फर्की फर्की’लाई रोहित अधिकारी र ओम अग्रवाल मिलेर निर्माण गर्दैछन् । फिल्म आउँदो बर्षको जेठ ११ गतेबाट रिलिज मिती घोषणा गरिएको छ । फिल्ममा मनोज वली र रामु न्यौपाने सह-निर्माताको रुपमा छन् । फिल्मका कार्यकारी निर्माता अनीरुद्र गिरी छन् ।
अनमोल र जसिता सँगै फर्की फर्की मा नव नायक रवि काफ्ले र नव नायिका समृद्धी अर्यालको मुख्य भूमिका रहनेछ । साथमा कृष्ण मल्ल, निर्मल शर्मा, विन्दा खतिवडा, अशिक गुरुङ, माओत्से गुरुङ, रुस्का वैद्य श्रेष्ठ, अर्नव घिमिरे र प्रेम पाण्डेको मुख्य भूमिका छ ।
फिल्ममा नरेन्द्र मैनालीको डीओपी, अष्ट महर्जनको एक्सन, सुयोग गुरुङको कथा तथा पटकथा, रोमन बज्राचार्य, नरेन लिम्बु र अनमोल गुरुङको संगीत, किरण थापाको कोरियोग्राफी, निमेष श्रेष्ठको सम्पादन रहनेछ ।
फिल्मको छायांकन पोखरा, मनाङ, काठमाडौं, अन्नपूणर् बेस क्याम्प र इन्डोनेसियाको बालीमा हुनेछ । अनमोल लामो समय पश्चात् फिल्ममा फर्किएका हुन् ।
