सुवेदीको ‘सतिदेवी’ लाई सबैको साथ
लक्ष्मण सुवेदी निर्देशित फिल्म ‘सतीदेवी’को शनिबार पहिलो झलक सार्वजनिक गरिएको थियो । सुवेदीको लेखन तथा निर्माण समेत रहेको सतीदेवीको पोस्टरलाई सेलिव्रेटीले समेत प्रशंसा गर्दै आफ्ना सामाजिक सञ्जालमा सेयर गरेका छन् ।
रेखा थापा, पूजा शर्मा, बर्षा सिवाकोटी लगायत सेलिव्रेटीले सतिदेवीको पोस्टरलाई आफ्नो फेसबुक वालमा सेयर गरेका छन् । पोस्टरमा नायिका मलिका महत मुख्य रुपमा प्रस्तुत छिन् । उनलाई जुत्ताको माला र कालो मोसो दलेर गाउँलेहरुले लखेटिरहेको पोस्टरमा देख्न सकिन्छ । ‘ईश्वरको उपहार, सृष्टि धान्छन्, होइनन् कर्महारा । छोरी बुझौँ, छोरी पुजौँ, यिनै संसार सारा’, पोस्टरमा उल्लेख गरिएको छ । पोस्टर र पंक्ति हेर्दा मलिकालाई फिल्ममा विद्रोही रहेको अनुमान लगाउन सकिन्छ ।
बाबु श्रेष्ठको छायांकन रहेको फिल्ममा तारा थापा ‘किम्भे’को सम्पादन, दीपक शर्मा र सुभाष भुषालको संगीत, रामजी लामिछानेको कोरियोग्राफी, सम्राट थापाको पाश्र्व संगीत रहेको ‘सतीदेवी’मा दिलासा र साराको प्रस्तुति छ । पोस्टर रिलिज गरिएपनि सतिदेवीको प्रदर्शन मिती तय गरिएको छैन् ।
फिल्म ‘सतिदेवी’मा मलिकासँगै हर्षिका वली, मञ्जिला बानियाँ, सन्दीप बाबु लोहनी, रमेश बुढाथोकी, कुलदीप अधिकारी, भोला सापकोटा, सृजना अधिकारी, सुजिता सिवाकोटी, सन्देश लिम्बू, मनिषा सापकोटालगायतको अभिनय रहेको छ ।
