‘परदेशी २’को देशमा ५१ दिन, विदेशमा प्रदर्शन सुरु
नारायण रायमाझी निर्देशित फिल्म ‘परदेशी २’ ले झण्डै एक दर्जन हलहरुमा ५१ दिन मनाउने भएको छ । राजधानी र मोफसल गरी फिल्मले आउँदो शनिबार प्रदर्शनको ५१ दिन मनाउने भएको हो ।
असोज २६ गतेदेखि प्रदर्शनमा आएको ‘परदेशी २’ काठमाडौंमा अस्टनारायण पिक्चर्स, गोपीकृष्ण मुभिज र आइएनआई सिनेमाज वानेश्वरमा फिल्म चलिरहेको छ । त्यस्तै, बुटवलको मिलन सिनेमा हल, दाङको श्री गणेश सिनेमा हल र भिएफएक्स सिनेमाज, कावासोतीमा रहेको कावासोती सिनेम्याक्स, नेपालगञ्जमा रहेको सिने रोयल, पोखराको श्रीकृष्ण हलमा चलचित्र अहिलेसम्म निरन्तर चलिरहेको निर्माता राजेश वंशलले जानकारी दिएका छन् । फिल्मले घरेलु बक्स अफिसमा कबिर ८ करोड ग्रस कलेक्सन गरेको निर्माता वंशलको भनाई छ ।
परदेशीको कथा भन्ने फिलम परदेशी २ मा प्रकाश सपुत, केकी अधिकारी र वर्षा सिवाकोटीसँगै प्रशान्त तामाङ, दीलिप रायमाझी, नीर शाह, रमा थपलिया, नीर शाह, सबिन बास्तोला, देबेन्द्र बब्लु लगायत कलाकारहरुको अभिनय छ ।
यस्तै ‘परदेशी २’ ले यूएई, कतार, इराक, ओमान, बहराइन लगायतका मध्यपूर्वका देशहरुबाट विदेशको प्रदर्शन सुरु गरेको छ । फिल्म कुवेतमा केही दिनमा प्रदर्शनमा आर्उँदैछ । माल्टामा फिल्मले दर्शकको साथ राम्रो पाएको छ । अमेरिकाको विभिन्न शहरमा फिल्मको प्रदर्शन सुरु भएको छ । निर्देशक रायमाझी स्वयंम नै यतिबेला फिल्म प्रदर्शनका लागि अमेरिका पुगेका छन् ।
फिनल्याण्ड र स्पेनको बार्सिलोनामा फिल्म प्रदर्शन हुने क्रममा छ । जापानका केही सहरमा फिल्म प्रदर्शन तय भएर प्रचार प्रसार सुरु भइसकेको छ ।
कोरियामा डिसेम्बर ३ बाट फिल्म प्रदर्शनमा आउँदैछ । अष्ट्रेलिया, यूके, हङकङ, न्यूजल्याण्ड, क्यानडासँगै भारतमा समेत फिल्म प्रदर्शन हुने तयारीमा रहेको निर्माता वंशलले जानकारी दिए ।
