प्रेम दिवसमा ‘बोक्सीको घर’को पहिलो झलक सार्वजनिक
फिल्म ‘बोक्सीको घर’को फस्टलुक पोस्टर रिलिज गरिएको छ । अभिनेत्री केकी अधिकारीले निर्माण गरेको फिल्मको पहिलो झलक प्रेम दिवसको अवसर पारेर सार्वजनिक गरिएको हो । फिल्म वैशाख १४ गते बाट रिलिज हुँदैछ ।
सार्वजनिक पोस्टर पूणर्रुपमा नेपाली समाजले बोक्सीका बारेमा बनाएको धारणामा आधारित छ । पोस्टर सिनेमाको नामसँग मिल्ने गरी बिम्बात्मकरुपमा डिजाइन गरिएको छ ।
नेपाली समाजमा बोक्सीले ‘कपाल फिजाएर रातो साडी लगाएर पूर्णीमाको दिनमा पिपलको रुखमा गएर पूजा गर्छन्’ भन्ने भनाइ रहेको छ । पोस्टरमा कपाल फिजाएर रातो साडी लगाएकी एक महिला अभिनेत्रीलाई ठूलो पिपलको रुखतर्फ फर्किएको देखाइएको छ । उक्त पहिला पात्रलाई पछाडिबाट देखाइएको छ, अनुहार देखाइएको छैन भने पूणर्िमाको चन्द्रमालाई डिजाइनमा समावेश गरिएको छ ।
यस हिसाबले पोस्टर एकदमै आकर्षक बनेको छ । सुलक्षण भारतीको लेखन तथा निर्देशन रहेको सिनेमालाई केकी अधिकारी फिल्मस्ले निर्माण गरेको हो भने सिनेमाका निर्माताका रुपमा केकीका बाबु बद्री अधिकारी रहेका छन् । यस्तै कार्यकारी निर्माता राज घिमिरे हुन् ।
केकी अधिकारी फिल्मस्को प्रस्तुतीमा निर्माण भएको सिनेमा नेपालसहित विभिन्न देशमा एकसाथ प्रदर्शन गर्नुका साथै अन्तर्राष्ट्रिय फेस्टिभलमा समेत लैजाने योजना उनको छ ।
सिनेमामा केकी सँगैसुपला सापकोटा, श्वेच्छा राउत, सुलक्षण भारती, रमा थपलिया, सुष्मा निरौला, सबिन बास्तोला लगायतको अभिनय छ । लोचन रिजालको ब्याकग्राउण्ड म्युजिक रहेको सिनेमालाई शिवराम श्रेष्ठले छायांकन, लोकेश बज्राचार्यले सम्पादन गरेका हुन् ।
