मिरुनाको ‘मनसरा’को डायस्पोरा प्रदर्शन पनि पक्का
उपेन्द्र सुब्बा निर्देशित फिल्म’मनसरा’को अष्ट्रेलिया तथा मध्यपूर्व प्रदर्शन अधिकार विक्री भएको छ । नेपाली सिनेमाको अन्तर्राष्ट्रिय वितरणमा सक्रिय सेभेन सिजले ’मनसरा’को वितरण अधिकार किनेको हो ।
सेभेन सिजले फिल्मलाई अष्ट्रेलिया, मध्यपूर्वसँगै अमेरिकामा पनि वितरण गर्नेछ । ’मनसरा’ निर्माण पक्ष र सेभेन सिजबीच आज यसबारेमा कागजी सम्झौता भएको हो । सम्झौता पत्रमा ’मनसरा’बाट उपेन्द्र र निर्माता शैलेन्द्र ध्वज कार्की तथा सेभेन सिजका तर्फबाट रमेश चौलागाईंले वितरणसम्बन्धी हस्ताक्षर गरेका हुन् । वैशाख २१ गतेबाट (मे ३ तारिख) प्रदर्शनमा आउनेछ । ’मनसरा’मा दयाहाङ राई, निरुना मगर, प्रविण खतिवडा, मेनुका प्रधान आदिको प्रमुख भूमिका रहेको छ ।
फिल्मले विवाहिता लिम्बुनीको विवाहित छिमेकी बाहुन बाजेसँगको सम्बन्धलाई कथा बनाएको छ। सिनेमाको सार्वजनिक टिजरले साधारण कथालाई रोचक बुनाइबाट पेस गर्ने देखाएको छ ।
निर्देशक सुब्बाकै लेखन रहेको सिनेमाका निर्माता छायाँकार शैलेन्द्र ध्वज कार्की हुन् । जारीको भव्य सफलता पश्चात् सुब्बाले दोश्रो फिल्म मनसरा निर्देशन गरेका हुन् ।
