प्रदीप खड्काको मुख्य भूमिकामा ‘एक्लो-१’ बन्दै
अभिनेता प्रदिप खड्काको साईफाई-जोम्बी थ्रिलर फिल्मको नामाकरण तय गरिएको छ । निर्माण पक्षले सोमबार फिल्मको नाम ‘एक्लो-१’ सार्वजनिक गरेको हो ।
निर्देशक प्रदीप शाहीले फिल्म ट्राइलोजी (तीन भाग) मा निर्माण हुने बताएका छन् । नाम घोषणा गर्दै सार्वजनिक गरिएको यो फिल्मको पोस्टरले ‘एक्लो-१’ हाल बनिसकेका र बन्दै आइरहेका फिल्म भन्दा फरक स्वादमा बन्ने अनुमान गर्न सकिन्छ । सार्वजनिक पोस्टरमा पात्रको अनुहार नखुलाइ स्पेस सुटमा प्रस्तुत गरिएको छ । स्पेससुटमा नेपालको झण्डा अंकित छ ।
स्पेससुट लगाएका पात्र को हुन स्पष्ट नभएपनि सिनेमाका प्रमुख अभिनेता प्रदिप खड्का नै हुन् । पोस्टरमा एक जोम्बी अनुहारलाई नेपथ्यमा प्रस्तुत गरिएको छ ।
फिल्ममा प्रदिपसँगै वेनिशा हमाल, विजय लामा, दीया पुन, कविता नेपाली, एवनराज उप्रेती तथा सुनिल थापाको अभिनय रहनेछ । शाइ प्रोडक्सन नेपालको ब्यानरमा निर्माण हुने चलचित्रमा ह्याम्साएर एकाउन्टेनको सहकार्य रहने छ ।
हाल सेट डिजाइनको काम र प्री प्रोडक्सनको सुरुवात भई रहेको कार्यकारी निर्माता क्षितिज सुवेदी खत्रीले बताए ।
निर्माता खत्रीका अनुसार छायाँकनका लागी नेपालमा नै पहिलो पटक अन्तरीक्षमा जाने रकेटको निर्माणको तयारी भैरहेको छ । फिल्म साउनको अन्तीमबाट छायाँकनमा जाने तयारीमा रहेको छ ।
