आर्यन, प्रदीप र पल स्टारर ‘पुजार सार्की’ को टिजर रिलिज
प्रतिक्षित फिल्म ‘पुजार सार्की’को टिजर रिलिज गरिएको छ । शुक्रवार रिलिज टिजरमा तीन स्टार अभिनेताहरू आर्यन सिग्देल, प्रदीप खड्का र पल शाह प्रस्तुत छन् । साथमा दुई अभिनेत्रीहरू अञ्जना बराइली र परीक्षा लिम्बुलाई पनि देख्न सकिन्छ । टिजर :
सार्वजनिक टिजरमा अभिनेता आर्यन पुजारीको भूमिकामा देखिएका छन् । डोली चढेर आउँदै गरेका उनी केही सामत्न लाग्छन् तर अर्को दृश्यमा भने मैत बहादुर बनेका प्रदीप खड्कासँगै भागिरहेका देखिन्छन् । एक दृश्यमा भुईँमा लडेर माफी मागिरहेका देखिन्छन् । आर्यनको भूमिकाले उनको पात्रको चारित्रिक दृष्टिकोणलाई बहु आयामिक देखाउँछ ।
दमाहा बजाउँदै गरेका प्रदीप खड्का बाजा बजाउने काम गरेको टिजरमा देखिन्छन् । उनले युवतीलाई मन पराएको र केही क्षणमा गाउँलेले आर्यन सहित लखेटिरहेको देखिन्छ । उनको भूमिकाले जातीय विभेदलाई दर्साएको छ । केही क्षणमा पल शाह देखिन्छन् । उनले भरुवा बन्दुक चलाएका छन् । उनले को माथि बन्दुक प्रहार गरेको त्यो भने खुलेको छैन् । टिजरका दृश्य सम्पादन गर्दा आर्यन र प्रदीप माथि बन्दुक हानी रहेको देखिएता पनि पलको भूमिका क्रान्तिकारी रहेको अनुमान गर्न सकिन्छ । टिजरमा अभिनेत्रीहरू बराइली र लिम्बुलाई गाउँले परिवेशका युवतीहरूको भूमिकामा प्रस्तुत गरिएको छ।
फिल्ममा मोहन निरौला, लोकेन्द्र लेखक, सुवास गजुरेल, विद्या कार्की, तारा शर्मा, शङ्कर आचार्य, प्रेम सुब्बा, गोविन्द रमण पराजुली, राजेश बिसुराल लगायतको पनि यस चलचित्रमा अभिनय रहेको छ ।
विकास सुवेदीले लेखेका छन्। यसअघि विकास र दिनेशले ’प्रकाश’मा सहकार्य गरेका थिए । फिल्मलाई सङ्गीतकार सुवास भुसालले निर्माण गरेका हुन् ।
