सेनको ‘बलिदान’मा दिव्य देव अनुबन्धित
आसुसेन फिल्मस्को नयाँ प्रोजेक्ट ‘बलिदान’मा अभिनेता दिव्य देव अनुबन्धित भएका छन् । शनिवार औपचारिक सम्झौता गर्दै उनलाई यस फिल्म मा भित्राइएको हो ।
फिल्मका प्रमुख भूमिकाहरूमध्ये एकमा दिव्यको अभिनय रहने निर्देशक सन्तोष सेनले बताए । “अभिनयमा पारङ्गत दिव्यजीलाई हामीले पहिलेदेखि नै नजरमा राखेका थियौँ तर औपचारिक रूपमा भने फिल्मको विषयमा कुराकानी गर्न पाएका थिएनौँ । ‘बलिदान’को एक प्रमुख पात्रको लागी उहाँ एकदमै सुहाउँदो कलाकार हुनुहुन्छ” निर्देशक सेनले भने, “यस फिल्ममा हामीले सबै उत्कृष्ट कलाकारहरूलाई अभिनय गराउँदै छौँ । फिल्ममा नयाँ भित्रिनु भएका कलाकारहरू पनि पहिले नै पोख्त भइसक्नुभएको छ ।”
नाट्य कर्म र चलचित्र अभिनयलाई सँगसँगै हिँडाइरहेका दिव्यले प्रमुख भूमिका निभाएको फिल्म ‘चिसो एस्ट्रे’बाट धेरै फिल्मकर्मीको नजरमा परेका थिए । उनले ‘हिजो आजका कुरा’, ‘दि सेक्रेट्स अफ राधा’, ‘महाजात्रा’ लगायतका फिल्ममा अभिनय गरेका छन् भने उनको प्रतीक्षित फिल्म ‘रुदाने’ भने रिलिजको पर्खाइमा छ । उनले हालै मात्र ‘मेयर’ फिल्ममा पनि अभिनय गरेका छन् । उनले अभिनय गरेको पछिल्लो नाटक ‘एउटा सपनाको अवसान’, ‘ट्रान्जिट’ लगायत निकै चर्चित छन् । उनले ‘लुक ब्याक इन एङ्गर’, ‘अन्ना इन द ट्रपिक्स’, ‘मिड समर नाइट्स ड्रिम’ लगायतका करिब दुई दर्जन अङ्ग्रेजी नाटकहरूमा पनि अभिनय गरेका छन् ।
अभिनेता दिव्यले ‘बलिदान’को टिमसँग जोडिन पाउँदा खुसी रहेको बताए । गत वर्ष नै रिलिज भएको यसको टिजरमा आवाज दिएका उनले निर्देशक सेनले त्यही बेला नै सँगै काम गर्ने प्रस्ताव गरेको बताए । उनले भने, “टिजरको समयमा नै उहाँले काम गर्नु पर्छ है भन्नु भएको थियो । मैंले पर्खिरहेको थिएँ । केही दिन अघि उहाँले बोलाउनु भयो र एउटा महत्वपूर्ण भूमिकामा काम गर्ने सहमति भयो । भव्यताका साथ फिल्म बनाउने आँट भएको मेकरसँग काममा जोडिन पाउँदा खुसी लागेको छ ।”
‘बलिदान’को प्रमुख भूमिकाबाट समीर भट्टले डेब्यु गर्दैछन् । यस फिल्ममा यसअघि अभिनेताद्वय सौगात मल्ल र अर्पण थापा तथा अभिनेत्री ऋचा शर्मा अनुबन्ध भइसकेका छन् । सबै स्टार कलाकारहरूको अभिनय रहने यस फिल्मलाई लिएर ठुलो अपेक्षा गरिएको छ ।
निर्माता सन्तोष सेनको मेगा प्रोजेक्टको रूपमा रुपमा लिइएको फिल्म ’बलिदान’ को टिजर छायाङ्कन अगावै रिलिज भैसकेको छ, जस्को चर्चा छ ।
