‘भाइरल गोर्खे’ मा अभिनय गर्दै ऋषि धमला
चर्चित सञ्चारकर्मी ऋषि धमला छायाँकनरत फिल्म ‘भाईरल गोर्खे’ मा कलाकारको रुपमा अनुबन्धित भएका छन् । सञ्चारकर्मी धमलाले फिल्ममा पत्रकारकै भुमिकामा अभिनय गर्न लागेको निर्माण टिमको भनाई छ ।
व्यस्तताका बावजुद पनि फिल्मको भूमिका मन परेकाले काम गर्न तयार भएको ऋषि धमलाले जानकारी दिएका छन् । आउँदो साताबाट धमलाको छायांकन सुरु गर्ने निर्माण युनिटको योजना छ । हाल फिल्मको लम्जुङको भुजुङ गाउँमा धमाधम छायांकन भैरहेको छ ।
निर्देशक निगम श्रेष्ठले फिल्मको कथा लेख्दा नै पत्रकार ऋषि धमलालाई हेरेर लेखेको बताए । ‘उहाँले व्यस्त समयका बीच पनि हाम्रो फिल्मलाई समय दिनु भएकोमा उहाँप्रति आभारी छौं । उहाँ सँगको सहकार्य अविस्मरणिय हुनेछ भन्ने विश्वास छ’, निर्देशक श्रेष्ठ भन्छन् ।
फिल्ममा सौगात मल्ल, सृष्टि श्रेष्ठ, बुद्धि तामाङ, लक्ष्मी गिरी र ऋषि धमला मुख्य भूमिकामा रहनेछन् । सामाजिक सञ्जालको प्रयोग र प्रभाव बढ्दै जाँदा भाईरल हुने जे पनि गर्ने प्रवृत्ति पछिल्लो समय बढ्दो खराब प्रवृत्तीलाई फिल्ममा देखाइनेछ ।
द जिएमआई एकेडेमी र निर्भाना फिल्म स्कुलको व्यानरमा निर्माण हुने फिल्मलाई अमर महर्जनले खिच्दै छन् । फिल्ममा बिशाल ताम्राकार र महेश लामिछानेको लगानी छ । फिल्मको छायांकन लम्जुङ, गोरखा र चितवनमा हुनेछ ।
