केकीको ‘बोक्सीको घर’को कलेक्सन ६ करोड माथि
केकी अधिकारीको फिल्म ‘बोक्सीको घर’ को पहिलो साताको कलेक्सन सार्वजनिक गरिएको छ । फिल्मले पहिलो साता ६ करोड माथिको व्यापार गर्ने अनुमान वितरक टिफल्क र डिसिएनले गरेको छ । फिल्मले बुधबारसम्म पाँच करोड ४५ लाख ग्रस कलेक्सन गरेको जानकारी वितरकद्धयले दिएका हुन् ।
फिल्म ‘बोक्सीको घर’ले बुधबार मात्रै एक करोड ६० लाख ब्यापार गरेको वितरक अशोक शर्माको दाबी छ । बिहीबार राजधानीमा प्रेसमिट गर्दै फिल्मलाई सफल बनाउने सम्पुणर् दर्शकलाई अभिनेत्री तथा निर्मात्री केकी अधिकारी र निर्देशक तथा लेखक सुलक्षण भारतीले धन्यवाद ज्ञापन गरे । यस्तै, यो फिल्मलाई देशकै ठुलो मल्टिप्लेक्स चेनले सुपरहिट घोषणा समेत गरेको छ ।
यो सँगै फिल्म ‘बोक्सीको घर’को दोस्रो श्रृंखला निर्माण हुने जानकारी निर्माण टिमले दिएको छ । बिहीबार आयोजित कार्यक्रममा निर्माता टिमले चाँडै दर्शकले सिक्वेल हेर्न पाउने जानकारी दिइयो । २ दिनअघि नै हलमा चलिरहेको सिनेमामा ‘टु बि कन्टिन्युड’ वाक्यांश राखिएको निर्मात्री तथा अभिनेत्री केकी अधिकारीले बताइन् ।
निर्देशक सुलक्षण भारतीले दोस्रो श्रृंखलाको स्क्रिप्ट लेखन सकिएको बताए । ‘स्क्रिप्ट लेखन सकिइसकेको छ,’ भारतीले भने, ‘बीचमा एउटा सिनेमा गरेर मात्र बोक्सीको घरको दोस्रो श्रृंखला बनाउँछु ।’ उनले अर्को सिनेमाको स्क्रिप्टको काम सकेर मात्र सिक्वेलको काम अघि बढाउने बताए ।
अभिनेत्री तथा निर्मात्री अधिकारीले ‘बोक्सीको घर’ सुपरहिट हुँदा आफूलाई सपना जस्तो लागिरहेको बताइन् । उनले भनिन्, ‘साँच्चै भन्नुहुन्छ भने मलाई सपना जस्तो महसुस भैरहेको छ । मलाई हो कि होइन जस्तो लागिरहेको छ ।’ कथावस्तु बलियो हुनुपर्छ भन्ने पाठ यो सिनेमाबाट सिकेको केकीले बताइन् ।
केकी अधिकारी फिल्मस्को प्रस्तुतीमा निर्माण भएको फिल्म नेपाल सहित विभिन्न देशमा एकसाथ प्रदर्शनसँगै अन्तर्राष्ट्रिय महोत्सवमा समेत लैजाने तयारी केकीको छ । सिनेमामा निर्माताका रुपमा केकीका बाबु बद्री अधिकारी रहेका छन् भने राज घिमिरे कार्यकारी निर्माता हुन् ।
फिल्ममा केकी सँगै सुपला सापकोटा, श्वेच्छा राउत, सुलक्षण भारती, रमा थपलिया, सुष्मा निरौला, सबिन बास्तोला लगायतको अभिनय छ । लोचन रिजालको ब्याकग्राउण्ड म्युजिक रहेको सिनेमामा शिवराम श्रेष्ठको छायांकन र लोकेश बज्राचार्यको सम्पादन छ ।
