‘फर्की फर्की’ गीत : अनमोल र जसिताको ‘अन्तिम माया’
अनमोल केसी र जसिता गुरुङ स्टारर फिल्म ‘फर्की फर्की’को दोस्रो गीत रिलिज भएको छ । फिल्मको सार्वजनिक यो गीत गायक नेरेन लिम्बुको हिट गीत ‘अन्तिम माया’को रि-एरेञ्ज हो । गीत हेर्नुस् :
शुक्रबार सार्वजनिक गरिएको गीतमा लिम्बुकै कम्पोज, लेखन र स्वर यो गीतमा समावेश छ । कथा वस्तुको महत्वपूणर् प्लटमा यो गीत तयार पारिएको बुझ्न सकिन्छ । विछोडको अवस्थामा गीत समावेश गरिएको अनुमान लगाउन सकिन्छ । नरेनकै हिट गीतलाई निर्माता रोहित अधिकारीले कथामा आवश्यक परेर रि-एरेन्जसहित समावेश गरिएको बताए ।
‘कथासँग यो गीतको गहिरो सम्बन्ध छ । दर्शक यो गीत सुन्दै भावनाको गहिराइमा पुग्न सक्नुहुन्छ’ अधिकारीले भने ।
सुयोग गुरुङको लेखन तथा निर्देशन रहेको फिल्म टाइम ट्राभल लभस्टोरीमा आधारित छ । फिल्ममा अनमोल र जसिताका सँगै कृष्ण मल्ल, निर्मल शर्मा, रवि काफ्ले, समृद्धि अर्याल लगायतको पनि अभिनय रहेको छ । फिल्ममा अभिनेता सलोन बस्नेत बिशेष भुमिकामा देखिएका छन् ।
रोहित अधिकारी फिल्मस्को प्रस्तुतिमा निर्माण भएको सिनेमाका निर्माता ओम प्रकाश अग्रवाल र रोहित अधिकारी हुन् । फिल्मका सह-निर्माता मनोज ओली र रामु न्यौपाने हुन् भने मोती कार्की र अनिरुद्र गिरी कार्यकारी निर्माताको रुपमा रहेका छन् ।
यो फिल्ममा नरेन्द्र मैनालीको छायांकन, सुरेन्द्र पौडेलको सम्पादन, रोमन बज्रचार्य र नरेन लिम्बूको संगीत तथा अष्ट महर्जनको द्वन्द्व निर्देशन छ । फिल्म फर्की फर्की जेठ १० गतेका लागि प्रतिक्षित छ ।
