प्रकाशपछि ‘पूर्ण बहादुरको सारङ्गी’मा मुकुन पक्का

अभिनेता मुकुन भुषाल फिल्म ‘पूर्ण बहादुरको सारङ्गी’ मा अनुबन्धित भएका छन् । यस अगाडी यो फिल्ममा अभिनेता प्रकाश सपुत पक्का भैसकेका छन् ।

अन्तर्राष्ट्रिय वितरण कम्पनी सेभेन सिज इन्टरटेनमेन्टले निर्माण गर्न लागेको फिल्मका लागि निर्माण पक्षले मुकुनसँग केही दिन अघि मात्रै लिखित सम्झौता गरेको हो । फिल्ममा मुकुनकोे भूमिका बारेमा अहिले केही पनि खुलाइएको छैन ।
फिल्म ‘पूर्ण बहादुरको सारङ्गी’मा अनुबन्धित भएसँगै मुकुनले भने, ‘एउटा कलाकारमा फरक चरित्रको भोक सधैँ रहन्छ । मैले यसमा पाएको भूमिका साँच्चिकै विशेष छ । यसबाट सबैले केही नयाँ परिचय पाउनु हुने छ, फिल्मलाई लिएर उत्साहित छु ।’

‘पूर्ण बहादुरको सारङ्गी’मा पनि उनलाई शीर्ष मध्येको भूमिकामध्ये एक महत्वपूर्ण पात्रमा देख्न सकिने पौडेलको भनाई छ । फिल्ममा मौलिक कथाको एक गहन विषयलाई उठान गर्न लागेको बुझ्न सकिन्छ । सोसल-ड्रामा बन्ने फिल्मका लेखन तथा निर्देशन सरोज पौडेल हुन् । जेठको दोस्रो साताबाट छायांकनमा जाने तयारी गरेको फिल्मको लागि अभिनेता फाइनल भए पनि निर्माण पक्षले अन्य कलाकार सार्वजनिक गरेको छैन् ।

फिल्ममा विनोद पौडेल र प्याट्रिक सुवेदीको लगानी रहनेछ । रमेश चौलागाईं र हरि श्रेष्ठ फिल्मका कार्यकारी निर्माता हुन् । महेश दवाडीको पटकथा तथा संवाद रहन फिल्ममा प्रशान्त सिवाकोटीको संगीत रहने छ । फिल्मको प्रदर्शन मिती तय गरिएको छैन् ।